Oekusipost.com Dili – Primeiru-Ministru, Taur Matan Ruak hato’o agradese uain ba Kay Rala Xanana Gusmão nia kontribuisaun durante ne’e hodi ajuda no sosializa propagasaun pandemia virus corona ba sidadaun sira iha rai laran.
Molok Prezidente Repúblika, Francisco Guterres Lu Olo anunsia Estadu emerjénsia, Kay Rala Xanana Gusmão hala’o ona serbisu balun atu oinsa informa ba komunidade sira tenke kombate no hado’ok a’an husi COVID-19 iha rai-laran.
Ho esforsu ne’e, ikus mai hetan elojia no apresiasaun boot husi Primeiru-Ministru, Taur Matan Ruak.
“Ne’e kontribuisaun di’ak ida. Sidadaun hotu-hotu tenke fó kontribuisaun, ne’ebé ha’u hanoin ne’e di’ak,” hateten PM Taur ba Jornalista sira iha Sentru Konvensaun Dili, Segunda 6 Abril 2020.
Suspeitu hamutuk nain 44, provavel nain 2, konfirmadu nain 1, no nain 41 mak negativu.
Portavós Sala Situasaun, Sentru Integradu ba Jestaun Krize, Sergio Lobo hateten, oras ne’e númeru husi 42 sa’e ba 44 tanba kazu rua mai hosi Munisípiu Kovalima. Ema iha konfinamentu obrigatóriu ka iha kuarentena totál na’in 1.220, kompostu hosi Munisípiu Dili nian hamutuk 1.016 no husi munisípiu sira hamutuk na’in 204. Positivu nafatin ida de’it.
