Oekusipost.com Dili – Iha loron hirak nia laran, ema barak liliu politika nain sira husi koaligasaun minoria kestiona no preokupa maka’as kona-bá enkontru ida ne’ebé lidera husi eis komandante em xefe das FAILINTIL, Kay Rala Xanana Gusmão iha nia rezidensia Lecidere, Dili Domingo 5 Abril liuba.
Ema barak kestiona enkontru ne’e, tanba involve ema barak no liga ba medida sira durante Estadu emerjénsia nian ne’ebé bandu tebes ema atu halibur malu, to’o familia ruma mak mate mós ema nain 10 de’it mak ba, seluk ne’e hela iha uma. Tur ka hamrik mós tenke do’ok ba malu ho distansia metru ida, maibé enkontru iha Lecidere foin lalais ne’e involve duni ema barak inklui membru governu sira balun mós partisipa.
Maske ema barak kestiona no preokupa ba enkontru ne’e, maibé Primeiru-Ministru, Jeneral Taur Matan Ruak la kestiona, la preokupa, no to'o nia membru governu balun involve iha enkontru ne'e mós, PM Taur dehan ne’e laiha problema ida.
“Ida ne’e membru sira ne’ebé hola parte iha governu husi CNRT nian ho sira seluk nian. Iha Sábadu-Domingo ha’u hanoin ne’e laiha problema,” hatete PM Taur ba Jornalista sira iha Sentru Konvensaun Dili, Segunda 6 Abril 2020.
Ministru Defeza no Seguransa no Ministru Interinu Interior, Filomeno da Paixão de Jesus konfesa katak enkontru ne’ebé lidera husi eis komandante em xefe das FALINTIL, Kay Rala Xanana Gusmão iha nia rezidensia Licedere iha loron Domingu 5 Abril liuba ko’alia kona-bá oinsa atu prevene no kombate moras virus corona iha Timor-Leste.
Filomeno da Paixão ne’ebé hetan konfiansa husi Prezidente Partidu Libertasaun Popular (PLP), Taur Matan Ruak hodi lidera Ministériu Defeza no Seguransa inklui Ministériu Interior ne’e katak, la sala nu’udar membru governu ida, marka prezensa iha enkontru ne’e hodi tau ideia hamutuk atu kombate COVID-19 iha rai laran.
“Maun Boot Xanana fó nia ideia, liuliu ba ami sira ne’ebé iha Governu, nune’e bele lori idea sira ne’e mai hato’o bá Primeiru-Ministru atu haree oinsá bele evita importa COVID-19,” esplika Ministru Paixão.
Governante mai husi munisipiu Likisa ne’e esplika no konsidera enkontru iha rezidensia Kay Rala Xanana Gusmão nian la viola regra Estadu emerjénsia tanba iha ne’ebá nafatin kumpre medida prevensaun sira.
“Ne’ebé atu dehan katak laiha buat ida, ami bá rona, Maun Boot hakarak fó ninia kontribuisaun ha’u senti ne’e pozitivu,” Filomeno esplika.
Kona-bá kestaun ne’e, Jeneral Taur Matan Ruak katak, hato’o agradese uain ba Kay Rala Xanana Gusmão nia kontribuisaun durante ne’e hodi ajuda no sosializa propagasaun virus corona ba sidadaun sira iha rai laran.
Entretantu, molok Prezidente Repúblika, Francisco Guterres Lu Olo anunsia Estadu emerjénsia mós, Kay Rala Xanana Gusmão hala’o ona serbisu balun atu oinsa informa ba komunidade sira tenke kombate no hado’ok a’an husi COVID-19 iha rai-laran.
Ho esforsu ne’e, ikus mai hetan elojia no apresiasaun boot husi Primeiru-Ministru, Taur Matan Ruak.
“Ne’e kontribuisaun di’ak ida. Sidadaun hotu-hotu tenke fó kontribuisaun, ne’ebé ha’u hanoin ne’e di’ak,” hateten PM Taur ba Jornalista sira iha Sentru Konvensaun Dili, Segunda 6 Abril 2020.
Portavós Sala Situasaun, Sentru Integradu ba Jestaun Krize, Sergio Lobo hateten, oras ne’e númeru husi 42 sa’e ba 44 tanba kazu rua mai hosi Munisípiu Kovalima. Ema iha konfinamentu obrigatóriu ka iha kuarentena totál na’in 1.220, kompostu hosi Munisípiu Dili nian hamutuk 1.016 no husi munisípiu sira hamutuk na’in 204. Positivu nafatin ida de’it.
