Oekusipost.com Dili – Ministériu Negósiu Estranjeiru no Kooperasaun (MNEK) husu ona ba Timoroan sira no estudante Timoroan sira ne’ebė eskola iha rai-liur atu labele mai Timor-Leste hodi evita propagasaun COVID-19 iha rai-laran.
"Husu atu maluk Sira ne'ebé hela iha liur, favor ida mantein iha ne'eba, fiar sistema saúde iha ne'eba. Buat ruma kona karik, ba kedan ospitál sira atu bele halo teste, no tratamentu, tanba moras ida ne'e, surtu mundiál,” hatete MNEK, Díonisio Babo Soares ba jornalista sira iha Palásiu Prezidensial, Ai-Tarak Laran, Dili Tersa 7 Abril 2020.
“Dala ida tan, ho respeitu no hadomi tomak ba Ita nia maluk Sira ne'ebé mak Sei iha rai liur, atu prevene nune'e labele iha ameasa ba ita nia saúde públika," esplika Mnistru Babo.
"Agora ne'e favor ida hela hotu iha ne'eba, kuidadu aan, governu Sei haree meius oinsa, husi embaixada Sira atu ajuda fó apoiu, favor ida labele fila mai Timor, hela iha ne'eba tanba, ita preve katak, iha semana ida ka rua tan, ita sei taka kompletamente iha nia frontera sira hotu," nia sujere.
Nia hatutan, prosesu ne’ebé difisil atu rekoella dadus Timoroan sira iha rai-liur mak iha Indonézia, tanba ema barak loos kuaje 8000 ne’ebé hela namkari iha teritóriu Indonézia.
Entretantu, embaixada Timor-Leste iha Jakarta, Indonézia mós hasai ona avizu ida ho númeru 004 hodi husu ba Timoroan sira ne’ebé eskola iha provinsia sira iha Indonézia atu labele la’o ba-mai iha fatin sira ne’ebé afetadu ona ho virus corona (COVID-19).
