Oekusipost.com Dili – Primeiru-Ministru, Taur Matan Ruak konfesa rajaun halo ezonerasaun ba eis Ministra Interina Saúde, Elia Amaral, tanba lakon ona konfiansa, no lakohi ona serbisu hamutuk ho nia.
"Razaun ida de'it ha'u lakon konfiansa ho membru governu sira, ha'u lakon konfiansa tanba ha'u lakohi atu servisu hamutuk ho nia. Pontu final," hatete PM Taur ba jornalista sira hafoin remata enkontru entre ekipa jestaun krize iha Sentru Konvensaun Dili (SKD), Segunda 6 Abril 2020.
“Dadauk ne’e seidauk, vise ministru atual mak sei tau matan, maibé sei bele hare ba futuru,” afirma PM TMR.
Entretantu, eis Vise Ministra Saúde antes ne’e katak to’o oras ne’e nia seidauk simu karta ezonerasaun ne’e, maibé PM Taur dehan dekretu Prezidente Repúblika (PR) fó sai tiha ona.
“Dekretu Prezidente sai ona, nia (Elia) mós sai tiha ona,” nia hateten.
Primeiru-Ministru, Taur Matan Ruak ezonera ona Vise Ministra Saúde, Élia António Amaral dos Reis husi nia kargu hafoin mosu dezintendimentu ka hadau malu fatin kona-bá hato’o informasaun virus corona ba públiku iha loron Kinta, 2 Abril 2020. ‑
Iha loron 2 Abril 2020, públiku sente hakfodak tebes ho informasaun kona-bá COVID-19. Sentru Media ne’ebé harii foin lalais ho intensaun atu halo informasaun kona-bá COVID-19 ne’e tenke sai husi odamatan ida de’it, maibé ikus mai sai husi odamatan tolu, husi Elia Amaral, Rui Maria de Araújo no Mericio Akara. ‑
Iha loron 26 Marsu 2020, Vise Ministra Elia mós habosok PM Taur hodi dehan suspeitu COVID-19 ida iha Same, Manufahi, maibé realidade informasaun ne’e bosok, tanba hetan kedas rejeisaun husi diretora serbisu saúde munisipiu Manufahi, Florência Tilman Corte-Real. ‑
Antes ne’e mós asosiasaun jornalista sira hanesan TLPU no AJTL halo konferensia imprensa ba públiku hodi kondena atitude membru governu ne’e relasiona ho nia maneira hato’o informasaun COVID-19 ba públiku la klaru, no nunka fó espasu ba jorna_lista sira atu husu pergunta. ‑
Nune’e, iha loron 3 Abril 2020 Primeiru-Ministru, Taur Matan Ruak halo ezonerasaun ba Elia Amaral bazeia ba dekretu númeru 30/2020, 3 Abril, ne'ebé hetan aseitasaun husi Prezidente Repúblika (PR), Francisco Guterres Lu Olo. Maibé, Prezidente Lu Olo to’o oras ne’e seidauk brani foti desijaun ruma ba pedidu demisaun husi Primeiru-Ministru Taur Matan Ruak ne’ebé nia rasik hatama iha fulan Fevereiru 2020.
