Oekusipost.com Dili – Prezidente Partidu Demokrátiku (PD) atual porta voz ba partidu koaligasaun Aliansa Maioria Parlamentar (AMP), deputadu Atónio da Conceição (Kalohan) hato’o solidaridade ba Elia Amaral ne’ebé hetan ona ezonerasaun husi Primeiru-Ministru, Taur Matan Ruak.
“Maibé iha situasaun ida hanesan ne’e, ita preokupa, tanba estrutura ida ne’ebe mak formal iha responsabilidade ba vida nasaun ninian. Ita hein dehan katak aktu sira hanesan ne’e labele iha implikasaun negativu hodi bele fó nafatin serbisu atendimentu ba ita nia populasaun sira,” hatete deputadu Kalohan iha Parlamentu Nasionál, Segunda 6 Abril 2020.
“Bankada ida ne’ebé mak durante ne’e vota nafatin ba OJE, hakarak mós atu deklara ami nia solidaridade ba Vise Ministra ne’ebé mak sai tiha ona, simu pasiensia, situasaun ne’ebé ita simu ita halo ba nasaun. Ita la halo ba grupu ida, la halo ba ema ruma, ita halo ba nasaun”.
Iha fatin hanesan, deputada Isabel Maria Barreto F. Ximenes husi bankada UDT/FM mós hato’o solidaridade hanesan.
“Hato’o ha’u nia solidadridade ba dotora Elia nu’udar feto maluk,” nia hatete.
Primeiru-Ministru, Taur Matan Ruak ezonera ona Vise Ministra Saúde, Élia António Amaral dos Reis husi nia kargu hafoin mosu dezintendimentu ka hadau malu fatin kona-bá hato’o informasaun virus corona ba públiku iha loron Kinta, 2 Abril 2020.
Iha loron 2 Abril 2020, públiku sente hakfodak tebes ho informasaun kona-bá COVID-19. Sentru Media ne’ebé harii foin lalais ho intensaun atu halo informasaun kona-bá COVID-19 ne’e tenke sai husi odamatan ida de’it, maibé ikus mai sai husi odamatan tolu, husi Elia Amaral, Rui Maria de Araújo no Mericio Akara.
Iha loron 26 Marsu 2020, Vise Ministra Elia mós habosok PM Taur hodi dehan suspeitu COVID-19 ida iha Same, Manufahi, maibé realidade informasaun ne’e bosok, tanba hetan kedas rejeisaun husi diretora serbisu saúde munisipiu Manufahi, Florência Tilman Corte-Real.
Antes ne’e mós asosiasaun jornalista sira hanesan TLPU no AJTL halo konferensia imprensa ba públiku hodi kondena atitude membru governu ne’e relasiona ho nia maneira hato’o informasaun COVID-19 ba públiku la klaru, no nunka fó espasu ba jorna_lista sira atu husu pergunta.
Nune’e, iha loron 3 Abril 2020 Primeiru-Ministru, Taur Matan Ruak halo ezonerasaun ba Elia Amaral bazeia ba dekretu númeru 30/2020, 3 Abril, ne'ebé hetan aseitasaun husi Prezidente Repúblika (PR), Francisco Guterres Lu Olo. Maibé, Prezidente Lu Olo to’o oras ne’e seidauk brani foti desijaun ruma ba pedidu demisaun husi Primeiru-Ministru Taur Matan Ruak ne’ebé nia rasik hatama iha fulan Fevereiru 2020.
