Oekusipost.com Dili – Ministru Defeza, Filomeno da Paixão de Jesus hateten, sei la rezigna a’an hodi hatudu nia solidaridade ba eis Ministra Interina Saúde, Elia Amaral ne’ebé hetan ona ezonerasaun husi Primeiru-Ministru, Taur Matan Ruak foin lalais.
Enkontru Aliansa Maioria Parlamentar (AMP) ne’ebé hala’o iha rezidensia Prezidente AMP, Kay Rala Xanana Gusmão iha Lecidere, Domingo 5 Abril 2020 diskuti assuntu lubuk ida inklui kona-bá propagasaun pandemia virus corona (COVID-19).
Entretantu, membru Komisariu Politika Nasionál (KPN) CNRT ida katak, diskusaun ne’ebé taka metin ba públiku ne’e nu’udar faze konsolidasaun forsa hodi “kontra atake” ba desijaun governu no Prezidente Repúblika (PR) ne’ebé dezide ezonera Elia Amaral iha loron 3 Abril 2020. Faze konsolidasaun ne’e kompostu husi pontu ha’at (4) mak hanesan, ezije loron 60 ba Prezidente Repúblika (PR), Francisco Guterres Lu Olo, destituisaun meja Parlamentu Nasionál (PN), mosaun sensura ba governu, no solidaridade.
Membru KPN ne’e esplika, AMP foun ne’ebé kompostu husi partidu 6 ne’e sei ezije nafatin ba PR tenke aseita ona pedidu demisaun Primeiru-Ministru, Taur Matan Ruak ne’ebé nia rasik hatama iha loron 25 Fevereiru 2020, tanba liu ona loron 60 nia laran. No halo mós destituisaun ba meja PN mak tuir kedas mosaun sensura ba governu, no tuir fali tan mak membru governu sira ne’ebé mai husi partidu CNRT, KHUNTO sei “rezigna a’an hotu kedas” nu’udar asaun solidaridade ba eis Ministra Interina Elia Amaral.
“Ha’u la rezigna, ha’u sai husi ha’u nia fatin so lei haruka. Lei haruka mak ha’u sai. Kuandu sai arbiru so dada mate de’it mak ha’u sai husi Ministériu Defeza,” hatete Ministru Paixäo ba Jornalista sira iha Palásiu Governu, Dili, Segunda 6 Abril 2020.
Enkontru ne’ebé hahu iha tuku 4 lorokraik no foin remata iha oras tuku 9 kalan ne’e partisipa mós husi Ministru Defeza, Filomeno Paixão, Ministra Interina Finansas, portavoz AMP, António da Conceição, eis Ministra Saúde, Elia Amaral no seluk tan.
Entretantu, protavoz AMP atual deputadu Partidu Demokrátiku, António da Conceição sente preokupa tebes ho desijaun xefe governu nian ba ezonerasaun Elia Amaral.
“Maibé iha situasaun ida hanesan ne’e, ita preokupa, tanba estrutura ida ne’ebe mak formal iha responsabilidade ba vida nasaun ninian. Ita hein dehan katak aktu sira hanesan ne’e labele iha implikasaun negativu hodi bele fó nafatin serbisu atendimentu ba ita nia populasaun sira,” hatete deputadu Kalohan iha Parlamentu Nasionál, Segunda 6 Abril 2020.
“Bankada ida ne’ebé mak durante ne’e vota nafatin ba OJE, hakarak mós atu deklara ami nia solidaridade ba Vise Ministra ne’ebé mak sai tiha ona, simu pasiensia, situasaun ne’ebé ita simu ita halo ba nasaun. Ita la halo ba grupu ida, la halo ba ema ruma, ita halo ba nasaun”.
Primeiru-Ministru, Taur Matan Ruak ezonera ona Vise Ministra Saúde, Élia António Amaral dos Reis husi nia kargu hafoin mosu dezintendimentu ka hadau malu fatin kona-bá hato’o informasaun virus corona ba públiku iha loron Kinta, 2 Abril 2020.
Iha loron 2 Abril 2020, públiku sente hakfodak tebes ho informasaun kona-bá COVID-19. Sentru Media ne’ebé harii foin lalais ho intensaun atu halo informasaun kona-bá COVID-19 ne’e tenke sai husi odamatan ida de’it, maibé ikus mai sai husi odamatan tolu, husi Elia Amaral, Rui Maria de Araújo no Mericio Akara.
Iha loron 26 Marsu 2020, Vise Ministra Elia mós habosok PM Taur hodi dehan suspeitu COVID-19 ida iha Same, Manufahi, maibé realidade informasaun ne’e bosok, tanba hetan kedas rejeisaun husi diretora serbisu saúde munisipiu Manufahi, Florência Tilman Corte-Real.
Antes ne’e mós asosiasaun jornalista sira hanesan TLPU no AJTL halo konferensia imprensa ba públiku hodi kondena atitude membru governu ne’e relasiona ho nia maneira hato’o informasaun COVID-19 ba públiku la klaru, no nunka fó espasu ba jorna_lista sira atu husu pergunta.
Nune’e, iha loron 3 Abril 2020 Primeiru-Ministru, Taur Matan Ruak halo ezonerasaun ba Elia Amaral bazeia ba dekretu númeru 30/2020, 3 Abril, ne'ebé hetan aseitasaun husi Prezidente Repúblika (PR), Francisco Guterres Lu Olo. Maibé, Prezidente Lu Olo to’o oras ne’e seidauk brani foti desijaun ruma ba pedidu demisaun husi Primeiru-Ministru Taur Matan Ruak ne’ebé nia rasik hatama iha fulan Fevereiru 2020.
