Oekusipost.com Dili – Prosesu ezonerasaun ba Ministra Interina Saúde, Elia Amaral konsege provoka tiha Aliansa Maioria Parlamentar (AMP) prepara ona kondisaun balun hodi hahu lansa “kontra atake” iha semana ne’e nia laran.
Enkontru ne’e maske taka metin ba públiku, maibé tuir membru Komisariu Politika Nasionál (KPN) partidu CNRT ne’ebé hola parte iha ekontru ne’e katak AMP oras ne’e konsolida hela forsa hodi halo “kontra atake” ho kartus musan ha’at (4) mak hanesan, ezije loron 60 ba Prezidente Repúblika (PR), Francisco Guterres Lu Olo, destituisaun meja Parlamentu Nasionál (PN), mosaun sensura ba governu, no solidaridade.
Membru KPN ne’e esplika, AMP foun ne’ebé kompostu husi partidu 6 ne’e sei ezije nafatin ba PR tenke aseita ona pedidu demisaun Primeiru-Ministru, Taur Matan Ruak ne’ebé nia rasik hatama iha loron 25 Fevereiru 2020, tanba liu ona loron 60 nia laran. No halo mós destituisaun ba meja PN mak tuir kedas mosaun sensura ba governu, no tuir fali tan mak membru governu sira ne’ebé mai husi partidu CNRT, KHUNTO sei “rezigna a’an hotu kedas” nu’udar asaun solidaridade ba eis Ministra Interina Elia Amaral.
“Pontu tolu ne’e klaru ona, ida solidaridade ne’e mak ita sei trava itoan hodi akompaña movimentu politika iha semana ne’e nia laran,” hatete membru KPN ne’e ba Oe-Kusi Post iha Lecidere, Dili, Domingo 5 Abril 2020 iha oras tuku 7 kalan.
Enkontru ne’ebé hahu iha tuku 4 lorokraik no foin remata iha oras tuku 9 kalan ne’e partisipa mós husi Ministru Defeza, Filomeno Paixão, Ministra Interina Finansas, portavoz AMP, António da Conceição, eis Ministra Saúde, Elia Amaral no seluk tan.
Primeiru-Ministru, Taur Matan Ruak ezonera ona Vise Ministra Saúde, Élia António Amaral dos Reis husi nia kargu hafoin mosu dezintendimentu ka hadau malu fatin kona-bá hato’o informasaun virus corona ba públiku iha loron Kinta, 2 Abril 2020.
Iha loron 2 Abril 2020, públiku sente hakfodak tebes ho informasaun kona-bá COVID-19. Sentru Media ne’ebé harii foin lalais ho intensaun atu halo informasaun kona-bá COVID-19 ne’e tenke sai husi odamatan ida de’it, maibé ikus mai sai husi odamatan tolu, husi Elia Amaral, Rui Maria de Araújo no Mericio Akara.
Iha loron 26 Marsu 2020, Vise Ministra Elia mós habosok PM Taur hodi dehan suspeitu COVID-19 ida iha Same, Manufahi, maibé realidade informasaun ne’e bosok, tanba hetan kedas rejeisaun husi diretora serbisu saúde munisipiu Manufahi, Florência Tilman Corte-Real.
Antes ne’e mós asosiasaun jornalista sira hanesan TLPU no AJTL halo konferensia imprensa ba públiku hodi kondena atitude membru governu ne’e relasiona ho nia maneira hato’o informasaun COVID-19 ba públiku la klaru, no nunka fó espasu ba jorna_lista sira atu husu pergunta.
Nune’e, iha loron 3 Abril 2020 Primeiru-Ministru, Taur Matan Ruak halo ezonerasaun ba Elia Amaral bazeia ba dekretu númeru 30/2020, 3 Abril, ne'ebé hetan aseitasaun husi Prezidente Repúblika (PR), Francisco Guterres Lu Olo.
Tuir informasaun ne’ebé Oe-Kusi Post asesu husi Palásiu Prezidensial katak, pedidu ne'e hato'o ona husi Primeiru-Ministru Taur Matan Ruak ba Prezidente Repúblika atu ezonera Ministra Saúde interina ne'e hahú tama vigór iha loron 3 Abril 2020.
Maibé, Prezidente Lu Olo to’o oras ne’e seidauk brani foti desijaun ruma ba pedidu demisaun husi Primeiru-Ministru Taur Matan Ruak ne’ebé nia rasik hatama iha fulan Fevereiru 2020.
