Komunidade Saben simu Xanana ho haksolok

SABEN (TOP) – Komunidade sira iha aldeia Saben, suku Bobometo, postu Oe-Silo, Oe-Kusi Ambeno simu eis Komandante em Chefe das FALINTIL, Kay Rala Xanana Gusmão ho haksolok tebes, tanba foin mak ba dahuluk lider karismátiku ne’e vizita aldeia ki’ik ne’ebé nia liña fronteira la to’o metru 100 ho fronteira Napan, Nusa Tenggara Timur (NTT), Indonézia.

Hafoin remata sosiliza prevensaun Covid-19 no asaun karitativa iha salaun parokia Oe-Silo, Xanana ho nia komitiva tomak kontinua hakat ba aldeia Saben.

Autoridade lokal, xefe aldeia Saben, Abilio Oki hamutuk ho lia-nain sira husi uma lisan tolu (3), Kote, Kuat-Nana, no Nai-Tufe mak simu eis primeiru-ministru ne’e ho lia dadoli no tebe tradisionál aldeia ne’e nian.

Xefe aldeia Saben, Abilio Oki aprezenta ba Xanana katak, geografikamente aldeia ne’e nia baliza la to’o metru 100 ho baliza Napan (NTT), no nia komunidade sira maioria nu’udar to’os nain.

“Total uma kain iha aldeia ne’e mak 250, no ami nia problema boot mak menues bee moos. Ha’u nia komunidade sira kada loron tenke la’o to’o kilo 10 mak foin hetan bee moos,” hateten xefe aldeia Saben, Abilio Oki ba Kay Rala Xanana Gusmão bainhira sosializa prevensaun Covid-19 no halo asaun karitativa ba komunidade sira iha aldeia ne’e iha Kuarta kalan, 19 Agustu 2020.

“Durante ne’e mós ha’u nia komunidade sira moris depende ba tranzasaun ilegal iha área fronteira, maibé hafoin tama ba Estadu Emerjénsia, ha’u nia komunidade sira hasoru problema boot, buat hotu paradu,” afirma xefe aldeia ne’e.

Iha fatin hanesan, Kay Rala Xanana Gusmão esplika ba komunidade aldeia Saben katak, rajaun vizita aldeia ne’e la’os mai ho misaun politika, la’os mai reprezenta governu no Estadu, maibé mai reprezenta aan rasik.

“Ha’u mai lori misaun ida naran misaun Covid-19, misaun ne’e laiha liu ligasaun ho politika,” hateten Xanana.

“Ohin imi hatete mai ha’u dehan imi besik loos fronteira ne’e, ha’u mai iha ne’e, tanba vida ka moris mak ha’u mai vizita imi. Ha’u husu ba imi tenke para ho tranzasaun ilegal iha área fronteira ne’e, tanba iha NTT ne’e moras Covid-19 iha ona,” Xanana afirma.

The Oe-Kusi Post (TOP) observa, komunidade sira iha aldeia ki’ik ne’e sente haksolok tebes simu Kay Rala Xanana Gusmão iha aldeia ki’ik ne’e.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE