OE-BAU (TOP) – Difisiente ida ho naran Ernesto Ote mate ho kondisaun tara aan iha nia uma kotuk iha Oe-Bau, suku Costa, postu Pante Macassar, Oe-Kusi Ambeno.
Matebian nia uma ne’e hateke malu ho Hotel no Restaurante Gratidão.
Iha jornada moris, matebian moris ho kondisaun difisiente ain sorin tesi tiha, no iha de’it oan feto ida, maibé hela do’ok husi nia. Durante tinan barak matebian hela ho nia oan hakiak Julio Elo Ote.
“Horkalan jam 11.00, ami han hotu ha’u ba hader mate uma loron 40 iha uma sorin ne’eba, depois ami mai fali tuku 5:00, mai ha’u atu bolu iha sorin ne’eba laiha, ha’u bolu dehan katuas, katuas, nia lahatan ida,” hakutir oan hakiak ne’e ba jornalista sira iha bairu Oe-Bau, Oe-Kusi Ambeno, Domingu 23 Agustu 2020.
“Ha’u sai mai fali husi ne’e bolu tan, no hare ba katuas kakorok metin iha ai-leten, ne’ebé ha’u mós tauk nonok tiha ba bolu fali katuas sira iha sorin atu ajuda kore, tanba ita atu kore mós tauk orsida polisia saida fali ita ne’e mak telefoni langsung ba polisia sira mai,” nia esplika.
Julio hatutan, durante ne’e matebian moras iha ospital, médiku sira dehan matebian nia ain kura la di’ak ona, tanba kanek maka’as, ikus mai desidi tesi tiha ain-sorin hodi loron kalan nia moris ho nia kareta roda.
“Nia ain tesi tiha tanba uluk monu, no katuas nia oan feto nain ida ne’ebé hela iha Lifau, ha’u hanesan oan hakiak. Durante ne’e ami laiha problema ruma, nia moris ne’e ko’alia dehan halo kedas ha’u nia kaixaun, ona tanba ha’u nia oras ne’e besik atu hotu ona, nia mak ko’alia hanesan ne’e”.
TOP observa ho akontesimentu ne’e, PNTL identifika ona kazu ne’e iha terenu, no lori kedas mate isin tau ona iha mortuáriu ospital referal Oe-Kusi Ambeno.
