AMBENO (TOP) – Eis Komandante em Xefe das FALINTIL, Kay Rala Xanana Gusmão oras ne’e iha ona Rejiaun Administrativu Espesial Oe-Kusi Ambeno (RAEOA) hodi sosializa misaun prevensaun moras virus corona (Covid-19) ba komunidade sira iha rai-ketan ne’e, liliu ba sira ne’ebé moris besik liña fronteira.
Tuir ajenda vizita ne’ebé The Oe-Kusi Post (TOP) asesu, Xanana to’o ona Oe-Kusi Ambeno iha loron Kuarta 19 Agustu 2020 ho ro SUCCESS. Hafoin tun husi ro ne’e, Xanana kontinua vizita kedas popupalasaun sira iha postu Oe-Silo, suku Bobometo hanesan hahu uluk husi Aldeia Nianapu, Oe-Baha, no kontinua hakat sa’e ba postu Oe-Silo villa ne’ebé komunidade husi aldeia tolu mak hein nia hanesan aldeia Oe-Noah, Hoineno, no Usapi-Kole. Aldeia tolu ne’e konsentra hamutuk iha salaun parokia Nossa Senhora do Rosário de Fátima Oe-Silo. Entretantun, aldeia Saben mesak de’it.
Husi aldeia hirak ne’e, iha aldeia rua mak sira nia área geográfika ne’e besik loos fronteira NTT (Napan). Distansia aldeia rua ne’e la to’o metru 100 ba Napan, NTT, Indonézia, no nu’udar mós fatin tranzasaun ilegal durante ne’e. Aldeia rua ne’e mak Usapi-Kole, no Saben.
Mensajen ne’ebé eis primeiru-ministru ne’e hato’o ba komunidade sira mak konsentra de’it kona-ba oinsa atu kontinua mantein prevene aan husi Covid-19, no husu mós ba komnidade sira atu la’o ba-mai iha área fronteira, tanba iha NTT liliu iha munisipiu Kefamenanu oras ne’e iha ona moras Covid-19.
“Ha’u husu ba imi tenke koidadu aan nafatin, no labele la’o ba-mai área fronteira, tanba iha ita nia nasaun viziñu oras ne’e moras Covid-19 aumenta. Loos duni ita seidauk iha, maibé laiha ema ida bele hatete mai ita katak ita sei laiha, tanba moras ne’e sei maka’as hela iha mundu,” hateten Xanana ba komunidade sira iha salaun parokia Nossa Senhora do Rosário de Fátima, Kuarta 19 Agustu 2020.
Hafoin remata, asaun karidade iha aldeia Saben ho nia total uma kain 250, Xanana ho nia komitiva sira deskansa kalan ida iha Parokia Oe-Silo.
Hafoin ida ne’e, iha loron Kinta 20 Agustu, Xanana ho nia komitiva sira vizita postu Unidade Patrulla Fronteira (UPF) Oe-Silo, no kontinua vizita tan postu Cruz iha postu Passabe, tun fali ba vizita komuindade sira iha suku Malelat, no mós komunidade sira iha suku Abani. Remata tiha viajen ne’e, Xanana deskansa iha kuaje parokia Passabe, no iha loorn Sesta 21 kontinua tun fali ba suku Usi-Takeno, suku Nibin hodi sosializa prevensaun Covid-19, no halo asaun karidade ba familia kbi’it la’ek sira iha suku ne’e.
Iha loron Sesta ne’e mós, vizita komunidade sira iha aldeia tolu partense ba suku Bobometo hanesan Kiubiselo, Tumin no Nonkikan. Iha aldeia tolu ne’e, Xanana mós aproveita vizita postu UPF ida Faot Basin iha Kiubiselo.
Vizita Kay Rala Xanana Gusmão iha Oe-Kusi Ambeno, sei remata iha loron 29 Agustu 2020.
