OEL -ULAN (TOP) – Kareta vaskolante ho númeru matrikula 57.347 baku fila iha Oel-Ulan, aldeia Noke, suku Naimeko konsege hamate tiha ema nain rua.
Kareta ne’e tula ema nain 21, no baku fila iha subida Kabukhae iha bairo Oel-Ulan, Oe-Kusi Ambeno. Ema nain rua ne’ebé mate mak Abilio de Araújo (45) mate fatin, no Hendrika Oqui (23) mate iha dalan ba ospital. Akontesimentu ne’e rezulta mós ema hamutuk nain 11 mak kanek todan, no nain 7 mak kanek kaman inklui labarik ki’ik nain rua.
Vitima Hendrika Sila konta katak iha loron Domingu 12 Jullu 2020 oras tuku 6:30 kalan, sira ekipa ida husi organizasaun São Rafael Minguel atu ba reza iha Gruta Nossa senhora Leolbatan no kontinua entrega apoiu humanitariu ba kbi’it la’ek sira iha bairo ne’eba, maibé la konsege tanba hetan dezastre boot ne’eba.
“Dalaruma kondutor mak hatama sala ka la dun kontrola standarizasaun mudansa, kareta hakiduk tun halai maka’as loos mak rezulta ema nain rua mate,” hateten Hendrika ba The Oe-Kusi Post iha hospital referal Oe-Kusi Ambeno, Segunda 13 Jullu 2020.
“Ami ba atu reza no fahe nesesidade báziku ba familia kbi’it la’ek balun, maibé la konsege, tanba hasoru fali dezastre ne’e”.
Iha fatin hanesan, diretór klinika hospital referal Oe-Kusi Ambeno, Baptista Punef katak dezastre ne’e balun mate, no balun kanek todan, barak mak hala’o hela tratamentu iha hospital.
“Sira horseik mai hotu iha sala emerjensia hamutuk nain 19 mak moris, nain 2 mate,” hateten dotor Punef.
Ho akontesimentu ne’e, iha kalan ne’e kedas komandante PNTL rejiaun Oe-kusi Ambeno Superintendente Xefe, Mateus Mendes haruka kedas nia elementus to’o kedas iha fatin akontesimentu hodi rezista dezastra ne’e.
“Akontesimentu ne’e ami hala’o kedas depois ami simu informasaun parte seguransa to’o kedas iha fatin ne’e rezulta ema nain 2 mate fatin,” nia esplika.
