Arsenio Bano rekoñese Oe-Kusi Ambeno seidauk iha osan

Prezidente Autoridade ba RAEOA, Arsenio Paixão Bano halo enkontru ba dala uluk ho nia funsionáriu sira iha salaun edukasaun Oe-Kusi Ambeno, Sesta 19 Juñu 2020. Foto The Oe-Kusi Post/Abilio Elo Nini.

AMBENO (TOP) – Antes ne’e mosu protesta no petisaun kontra José Luis Guterres ‘Lugu’ katak tenke nomeia ona sekretáriu rejionál sira hodi hala’o serbisu, maibé oras ne’e Prezidente Autoridade ba Rejiaun Administrativu Espesial Oe-Kusi Ambeno (RAEOA) no Zona Espesial ba Ekonomia Sosial Merkadu (ZEESM), Arsenio Paixão Bano husu ona ba funsionáriu sira hodi hein lai itoan mak foin halo nomeasaun ba sekretáriu rejionál sira, tanba to’o oras ne’e governu sentral seidauk transfere osan ba Oe-Kusi Ambeno.

"Ita boot sira tuur iha ne’e para hein no husu bainhira mak sekretáriu rejionál sira hetan tomada de pose? Ha’u husu ba imi kalma itoan fó tempu semana ida ka rua ba ha’u, atu halo ezersisiu ida hanoin iha Oe-Kusi Ambeno hare mós orsamentu ne’e ita iha ka la’e ka to’o ne’ebé ona, tanba ha’u hatene orsamentu husi governu sentral seidauk haruka mai,” esplika Bano bainhira hala’o enkontru dahuluk ho nia funsionáriu sira iha salaun edukasaun Oe-Kusi Ambeno, Sesta 19 Juñu 2020.

Maske osan seidauk iha, maibé Bano promete ona katak sei aprezenta lista kandidatura sekretáriu rejionál sira ba governu sentral iha tempu badak.

“Se orsamentu 2020 nian seidauk aloka ba rejiaun ita tenki hatene. Sei ita nomeia sekretáriu rejionál sira ba Primeiru Ministru depois ema sira mai mak osan laiha, osan la too ita tenki prepara uluk buat sira ne’e mak ita propoin,” esplika Bano.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE