DILI (TOP) — Vitima Domingos Seco, nu’udar mós koordenador partidu Congresso Nasionál Reconstrução Timorense (CNRT) ida iha Oe-Kusi Ambeno hafoin votasaun iha sentru votasaun Lamas, RAEOA ema deskoñesidu sunu nia uma iha aldeia Lamas suku Suku Bene-Ufe, Sub-Rejiaun Nitibe, iha Rejiaun Administrativu Espesiál Oe-Kusi Ambeno.
“Ahi han ha’u nia uma ne’e, ami foin vota hotu no komunidade sira hamrik iha estrada hodi hein de’it orás atu halo kontajén votu iha sentru votasaun derepente ema sunu ha’u nia uma,” hateten Domingos Seco via kontaktu telemovél ba The Oe-Kusi Post (TOP), Domingu 20 Marsu 2022.
Vitima Domingos Seco informa, iha dadersan nia hamutuk ho familia sira ba tuir votasaun no la haruka ema ruma hodi hein sira nia rejidensia nune’e ema deskoñesidu maka sunu nia uma ne’e.
“Ha’u hanesan koordenador partidu CNRT iha aldeia Lamas no haruka ha’u nia oan na’in-rua hanesan Franscisco Seco, Costansio Seco tama hotu fiskais apoiu ba kandidatura Prezidente Repúblika José Manuel Ramos Horta ho númeru sorteiu 14,” nia hateten.
Nia hatutan, tanba iha sentru votasaun Lamas kandidatu Prezidente Repúblika José Ramos Horta ho numeru sorteiu 14, maka manan ho votante nain 91 iha sentru votasaun Lamas.
“Ha’u deskonfia ema deskoñesidu sunu ha’u nia uma. Tanba ha’u nia oan na’in-rua tama hotu fiskais ba apoiu kandidatu Prezidente Repúblika José Ramos-Horta”.
Nia esplika molok sira sai husi uma eletrisidade mos mate, la sunu lilin ruma iha uma laran maibé ema ruma maka sunu hau nia uma tanba ahi hahu lakan iha ema nia parte oin kedas.
Tuir rezultadu apuramentu final husi STAE, hatudu kandidatu PR José Manuel Ramos-Horta hetan votu hamutuk 19,323 (51.58%), no kandidatu PR Lú Olo hetan de’it votu 11,216 (29.94%).
Iha parte seluk, rezultadu provizoriu apuramentu nasionál inklui rai-liur iha oras tuku 11:51 Domingu kalan hatudu, kandidatu PR José Manuel Ramos-Horta hetan votu barak liu 232,508 (45.74%), no tuir fali mak kandidatu PR Francisco Guterres Lú Olo ho total votu 114,277 (22.48%).
Total votu ba kandidatu hirak ne’e sei iha mudansa, tanba prosesu apuramentu oras ne’e sei kontinua la’o hela iha Sekretariadu Tékniku ba Administrasaun Eleitorál (STAE) nasionál.
