AMBENO (TOP) – Ekipa Sekretáriadu Tékniku ba Administrasaun Eleitorál (STAE) iha Rejiaun Administrativa Espesiál Oe-Kusi Ambeno (RAEOA), abandona tiha fatin apuramentu ba durante horas ida resin.
The Oe-Kusi Post observa iha prosesu apuramentu ne’e hahu iha loron Domingu 20 Marsu 2022 oras tuku 1 kalan, no kontinua to’o fali Domingo kalan tuku 8:00, deside deskansa atu ba han kalan nian. Desijaun ne’e iha konkordansia ho fiskál kandidatura na’in-16.
Iha konkordansia parte sira deside sei kontinua hikas iha tuku 9:00 kalan. Parte fiskál sira kumpri konkordansia ne’e, infelizmente parte STAE husik hela fatin apuramentu ne’e, no to’o tuku 10: 15 mós seidauk hahu. Foin hahu halo apuramentu iha oras tuku 10:25.
“Ita telefone ba mós sira lakohi foti, ohin ita konkorda ona maibé agora sira seidauk mai, hanesan ne’e serbisu la profisionál, ita hotu hala’o serbisu hotu desde horkalan to’o agora” hatete fiskál ida iha salaun Alfandega Oe-Kusi Ambeno.
Kandidatu Preziden Repúblika ba periodu 2022-2027 ho númeru sorteriu 14 ne’ebé hetan apoiu total husi partidu CNRT, José Manuel Ramos-Horta mak hetan votu barak liu kompara ho kandidatu nain 15 seluk iha Oe-Kusi Ambeno.
Sentru votasaun iha Ambeno hamutuk 60 ho nia estasaun votasaun hamutuk 88 ne’ebé namkarik iha suku 18 laran iha Oe-Kusi Ambeno. Husi sentru votasaun no estasaun votu hirak ne’e, kandidatu PR ho númeru sorteiu 14 mak hetan votu barak liu, no tuir kedas mak kandidatu PR ho númeru sorteiu 6.
Tuir rezultadu dadus fiskais apuramentu husi Rejiaun Administrativu Espesial Oe-Kusi Ambeno (RAEOA) ne’ebé The Oe-Kusi Post asesu, kandidatu PR José Manuel Ramos-Horta hetan votu hamutuk 19,323 (38%), no kandidatu PR Lú Olo hetan de’it votu 11,216.
Iha parte seluk, rezultadu provizoriu apuramentu nasionál inklui rai-liur iha oras tuku 11:51 kalan hatudu, kandidatu PR José Manuel Ramos-Horta hetan votu barak liu 232,508 (45.74%), no tuir fali mak kandidatu PR Francisco Guterres Lú Olo ho total votu 114,277 (22.48%).
Total votu ba kandidatu hirak ne’e sei iha mudansa, tanba prosesu apuramentu oras ne’e sei kontinua la’o hela iha Sekretariadu Tékniku ba Administrasaun Eleitorál (STAE) nasionál.
