AMBENO (TOP) – Kandidatu Prezidente Repúblika ba periodu 2022-2027 ho númeru sorteiu 14 ne’ebé hetan apoiu total husi partidu CNRT, José Manuel Ramos-Horta mak hetan votu barak liu kompara ho kandidatu nain 15 seluk iha Oe-Kusi Ambeno.
Sentru votasaun iha Ambeno hamutuk 60 ho nia estasaun votasaun hamutuk 88 ne’ebé namkari iha suku 18 laran iha Oe-Kusi Ambeno. Husi sentru votasaun no estasaun votu hirak ne’e, kandidatu PR ho númeru sorteiu 14 mak hetan votu barak liu, no tuir kedas mak kandidatu PR ho númeru sorteiu 6.
Tuir rezultadu dadus fiskais apuramentu husi Rejiaun Administrativu Espesial Oe-Kusi Ambeno (RAEOA) ne’ebé The Oe-Kusi Post (TOP) asesu, kandidatu PR José Manuel Ramos-Horta hetan votu hamutuk 19,405 (38%), no kandidatu PR Lú Olo hetan de’it votu 11,317 (22%). Tuir fali mak kandidatu PR Armanda Berta dos Santos ho númeru sorteiu 9 hetan votu hamutuk 2257 (4%), no kandidatu PR Mariano Asanami Sabino ho total votu 1957 (4%).
Iha parte seluk, tuir rezultadu provizoriu apuramentu nasionál inklui rai-liur ohin iha horas tuku 15:53 hatudu kandidatu Prezidente Repúblika José Manuel Ramos-Horta hetan votu hamutuk 124,698 (44.59%), no kandidatu Prezidente Repúblika Francisco Guterres Lú Olo hetan votu hamutuk 67,133 (24.01%).
Total votu ba kandidatu hirak ne’e sei iha mudansa, tanba prosesu apuramentu oras ne’e sei kontinua la’o hela iha Sekretariadu Tékniku ba Administrasaun Eleitorál (STAE) nasionál.
