AMBENO (TOP) – Esforsu kamarada Arsenio Paixão Bano nu’udar Prezidente Autoridade ba Rejiaun Administrativu Espesial Oe-Kusi Ambeno ne’ebé durante ne’e halo serbisu maka’as atu lori kandidatura Prezidente Repúblika Francisco Guterre Lú Olo tenke manan maioria iha rai-ketan Oe-Kusi Ambeno, ikus mai folin la’ek tebes basa iha nia suku rasik de’it mós Lú Olo simu derota.
Esforsu Bano nian ho bosok oioin, bosok tun-sa’e durante ne’e lakonsege konvense povu Ambeno nia fuan-laran hodi vota ba kandidatu Lú Olo, maibé ninia esforsu ne’e atu hanesan loke dalan hodi “hakoi” no lori Lú Olo ba derota mak iha, tanba kandidatu PR Horta mak manan iha Bano nia aldeia laran ho total votu 2016, no kandidatu Lu Olo hetan de’it votu hamutuk 1094.
Kamarada Bano atual eis vise-prezidente partidu FRETILIN ne'e mai husi aldeia Sanane, suku Costa, sub-rejiaun Pante Makassar, Oe-Kusi Ambeno.
The Oe-Kusi Post (TOP) observa aldeia Sanane ne’e iha sentru votasaun tolu, sentru votasaun EBC Palaban kandidatu Horta hetan votu 300 – Lú Olo hetan 122, iha fali sentru votasaun Eskola Santo Antonio Oe-Kusi Ambeno, Horta hetan 674, Lú Olo hetan 570, no iha sentru votasaun EBF Masin, Horta hetan 1042, Lú Olo hetan 402. Husi total sentru votasaun tolu ne’e mak rezulta kandidatu PR Horta hetan votu hamutuk 2,016, no Lú Olo hetan de’it 1,094.
Total sentru votasaun sira iha Oe-Kusi Ambeno hamutuk 60 ho estasaun votu hamutuk 88 ne’ebé namkarik iha sulu 18 nia laran, no tuir informasaun ne’ebé The Oe-Kusi Post (TOP) asesu, parte CNE foin mak remata apura sentru votasaun 4, no sentru votasaun sira seluk foin mak hahu apura ohin no iha posbilidade sei hotu iha ohin lorokraik ka aban.
Husi apuramentu ne’e, rezultadu provizoriu kandidatu PR José Manuel Ramos-Horta hetan votu hamutuk 19,735 no kandidatu PR Lú Olo foin mak hetan 11,263. Rezultadu provizoriu ne’e sei iha no akontese mudansa hafoin prosesu apuramentu RAEO remata.
