AMBENO (TOP) – Durante tinan lima (5) resin hahu husi Prezidente Autoridade ba Rejiaun Administrativu Espesial Oe-Kusi Ambeno Mari Bim Amude Alkatiri to’o mai Arsenio Paixão Bano sempre halo kanta maka’as iha rai-laran katak, rai-ketan Oe-Kusi Ambeno nabilan tebes kompara ho munisipiu sira seluk iha teritoriu nasionál, maibé realidade hatudu kondisaun estrada sira iha suku 15 la nabilan no la kaber hanesan Arsenio Bano nia oin.
Tuir fotografia balun ne’ebé The Oe-Kusi Post (TOP) asesu husi Administrador Postu Administrativu Baoknana, Manuel Tolan katak, kondisaun estrada sira iha Fuabaon-Ana (Kuatenes), Faefmouf (Nefo-Lete), Pune tun ba Noe-Toko a’at loos.
“Susar bain rua atu lori Urna ba eleisaun prezidensial kareta la bele liu, obrigadu tenke la’o ain hodi to’o fatin sentru votasaun no estasaun votu,” katak Manuel Tolan iha nia konta media sosial (Facebook) ne’ebé TOP asesu, Kuarta 16 Marsu 2022.
Tolan dehan, nia parte informa ona ba obras públika hodi ajuda hadia, maibé resposta ne’ebé nia hetan mak kombustivel laiha hodi bele mobiliza ekipamentu pejadu sira atu bele ba hadia estrada ne’e.
Cesario Rdc Salu mós komenta iha postajen Facebook ne’e katak, kondisaun estrada iha parte ne’e a’at tebes duni.
“La’os dehan atu bosok. Fulan 2 liuba ha’u liu husi dalan ne’e. Husi Nefo-Lete mai vila laran. La’o ho tanis tanba motor la’o la di’ak tan tahu dodok tebes,” komenta Cesario Rdc Salu.
