PALABAN (TOP) – Eleisaun prezidensial sei akontese iha loron Sábadu, 19 Marsu 2022 husi tuku 7 dadersan to’o tuku 3 lorokraik, maibé Sekretariadu Tékniku ba Administrasaun Eleitorál (STAE) konsege identifika bulletin votu hamutuk tahan 92 mak fo’er loos, no nakles uluk ona iha Oe-Kusi Ambeno.
Rejiaun Administrativu Espesial Oe-Kusi Ambeno (RAEOA) hetan bulletin votu hamutuk kaixa 21 ho nia livru (tahan) hamutuk 1.166 ne’ebé sei fahe ba sentru votasaun sira hamutuk 60 ho estasaun votu sira hamutuk 88 ne’ebé namkari iha suku 18 iha Oe-Kusi Ambeno.
Diretora STAE Oe-Kusi Ambeno, Luiza da Costa esplika, ekipa sira hahu halo verifikasaun ba bulletin votu hirak ne’e durante loron tolu nia laran, husi loron 14-16 Marsu 2022. Prosesu verifikasaun ne’e hetan supervizaun direita husi parte CNE mós.
“Ita hetan bulletin votu hamutuk kaixa 21 ho nia livru hamutuk 1.166, no rezultadu verifikasaun hatudu bulletin votu balun nakles no foer ona,” katak Luiza da Costa ba jornalista sira iha salaun alfandega iha Palaban, Oe-Kusi Ambeno, Kuarta 16 Marsu 2022.
Nia hatutan, bulletin votu hirak ne’ebé a’at ona kompostu husi tahan 92 mak nakles, bulletin votu iha sinal hamutuk 33, tahan 57 mak laiha númeru serial, iha tahan ida mak nia númeru serial dupla, tahan ida mak nia númeru serial tesi aat tiha, bulletin votu iha tahan rua mak sira nia númeru serial nakfilak tiha, iha tahan 10 mak kona tinta impresora. Nune’e, bulletin votu hamutuk tahan 198 mak aat ona.
“Ne’ebé hamutuk 198 mak sei tau karimbu kanseladu,” afirma Luiza da Costa.
Antes ne’e, iha loron 11 Marsu liuba, STAE nasionál distribui ona bulletin votu hamutuk livru 19.462 ne’e, iha totál buletin votu 963.600 ba sentru votasaun no estasaun votu sira iha teritóriu nasionál.
