Uma kain 339 iha Fatuk-Makerek seidauk asesu eletrisidade

FATUK-MAKEREK (TOP) – Suku Fatuk-Makerek nu’udar rai-rohan ida partense ba munisipiu Manatuto ne’ebé to’o oras ne’e seidauk asesu ba enerjia eletrisidade, no kondisaun estrada husi suku Funar ba suku ne’e mós a’at tebes, maibé komunidade sira iha suku ne’e moris iha kondisaun paz no dame nia laran.

Xefe Suku Fatuk-Makerek, Cesar Soares de Oliveira fó sai total populasaun iha suku ne’e hamutuk 339 ho nia abitante maka 1547.

“Susar no terus barak maka ami hasoru. Dalan iha, maibé kondisaun maka a’at tebes, maibé ami la halerik, la tane liman, no ami la husu,” hateten xefe suku Cesar ba vizita Kay Rala Xanana Gusmão iha suku ne’e Segunda 28 Setembru 2020.

Nia hatutan, estrada ligasaun husi suku Funar ba suku Fatuk-Makerek foin mak loke husi Ajensia Dezenvolvimentu Nasionál (ADN) iha tinan 2010, maibé to’o oras ne’e seidauk iha bee dalan, no seidauk fui alkatraun. Kondisaun estrada ne’e susar tebes iha tempu udan, tanba tahu barak no namdoras.

Suku ne’e mós to’o ohin loron seidauk asesu ba enerjia eletrisidade maske suku viziñu sira ne’ebé partense ba postu Turiskai (Manufahi), no Likidoe (Aileu) asesu ona eletrisidade.

“Dala barak sunu de’it kamii, no dalaruma sosa netik lilin, maibé realidade to’o ohin loron ami seidauk asesu ba enerjia eletrisidade,” nia hateten.

Nia hatutan, maske hasoru hela problema hirak ne’e, nu’udar autoridade lokál nia la husu no la ezije, maibé ho esperansa boot katak bainhira Kay Rala Xanana Gusmão fila ba ukun mak sei hadia hotu kondisaun hirak ne’e.

“Ami nafatin fó konfiansa ba Avo Nana atu oinsa suku ida ne’e hodi hetan netik enerjia eletrisidade ka solar panel ruma ho kondisaun estrada ne’ebé di’ak itoan,” nia afirma.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE