Xanana selebra nia loron moris ho matan been

DILI (TOP) – Misa selebrasaun ba loron moris eis Komandante em Chefe das FALINTIL, Kay Rala Xanana Gusmão ba tinan 74 nakonu ho mata been sulin, tanba lori nia hanoin hikas inisiu organiza funu iha tinan 40 liuba.

Molok realiza misa agradesementu, iha parte dadersan lider karismátiku, Kay Rala Xanana Gusmão festeza nia loron moris ba dala 74 (20 Juñu 1946 - 20 Jeñu 2020) ho atividade limpeja jerál iha área Jardin Igreja Motael Dili nian.

Atividade limpeja jerál ne’e hetan partisipasaun masimu hosi labarik ki’ik sira inklui ekipa Bombeiro Dili ne’ebé apoiu transporte hodi hamoos duut, no rega aifuan sira ne’ebé kuda heleu iha Jardin 12 Novembru nian.

Iha limpeza ne’e Xanana husu ba labarik sira tenki badinas hamoos foer nu’udar asaun ida hadomi natura iha nasaun ne’e.

“Ita limpeza tiha maka avó fahe dosi, agora imi limpeza lai ne’e, tanba ita tenki hadomi ita nia rain ho hamoos bebeik foer hanesan ezersisiu kiik ida atu amima no motiva imi,” dehan Xanana durante limpeza ho labarik sira.

Fatin hanesan, Komandante Ekipa Bombeiros Dili, Paulo Maia hato’o agradese no parabéns ba Xanana, tanba mezmu halo aniversariu, maibé Xanana sempre konvida Bombeiro hodi partisipa iha eventu ne’e.

Kay Rala Xanana Gusmão hasai fotografia hamutuk ho padre sira iha Igreja Balide Dili, hafoin partisipa misa agradesimentu. Foto The Oe-Kusi Post/Raimundos Oki 

“Parabéns maun boot, ohin halo tinan, maibé konvida ami mai hodi selebra aniversáriu ho atividade limpeza ne’e buat ida di’ak tebes ba ita rain,” dehan Paulo.

Durante hala’o limpeja jerál, ema barak ne’ebé liu iha estrada públiku para karreta no motór lori labarik kiik too ema boot aproveita hodi kumprimenta no hato’o parabéns ba Xanana.

Hafoin limpeza jeral, iha oras tuku 3 lorokraik, Xanana partisipa misa agradesementu ba nia tinan iha igreja Balide ne’ebé hetan partisipasaun husi ema lubun boot, no prezide husi padre hamutuk nain 14. Misa agradesmentu ne’e la’os hala’o de’it iha Dili, maibé hala’o mós iha Diocese Maliana ne’ebé dirije direitamente husi Bispo Diocese Maliana, Dom Norberto do Amaral, no hala’o mós iha igreja parokia Maubise no iha fatin seluk tan. Padre Angêlo Salsinha mak sai nu’udar padre selebrante iha misa agradesementu ne’e.

“Ho respeitu tomak mós ba amu selebrante, katuas no ferik sira hotu, ha’u agradese tebe-tebes ba hotu- hotu nia esperitu solidaridade reza ba ha’u ho misa ida ne’e, halo ha’u hanoin iha tinan 40 ba kotuk, 1980 iha Ostico, ami loke unidade hodi funu hahú iha Kosta Súl mai too Sentru Súl,” Xanana hateten liu husi nia diskursu iha Igreja Balide, Sábadu 20 Juñu 2020.

Xanana hato’o agradese ba ema hotu ne’ebé partisipa misa no selebra misa iha fatin seluk ba nia atu kontinua hametin nafatin sira nia unidade liu-liu buka kria dame ho ema iha Timor-Leste.

“Iha tempu oras hanensan ne’e, ita hotu buka harii uninidade ho domin maka bele lori ita atu moris respeita malu di’ak liután,” Xanana hateten ho tanis to’o matan been sulin.

Kay Xanana Gusmão tanis rei padre nia liman iha Igreja Balide Dili. Foto The Oe-Kusi Post/Raimundos Oki

Hafoin nia diskursu ne’e, Xanana hakat ba altar leten ho tanis kumprimenta Padre José Figuera, José Martins, Domingos Maubere ho kaer liman no agradese nai lulik sira ne’ebé sempre fó korajen no akompaña nia viazen moris tomak durante funu iha tempu susar too Timor-Leste ukun aan.

“Ha’ u nia respeita, ba Padre José Figuera no José Martins, Domingos Maubere no padre foin sa’e sira seluk sempre motiva no akompaña nafatin ha’u too mai ohin,” dehan Xanana hodi hakuak metin padre José Figuera no José Martins.

Iha fatin hanesan, Padre José Figuera no José Martins, Domingos Maubere hato’o parabéns ba Xanana hodi simu ho liman rua ba kuakér dezafiu ne’ebé Xanana hasoru iha ninia moris tomak.

“Ami akompaña nafatin ita viazen no moris tomak,” katak Padre José Figuera.

Padre Selebrante, Angêlo Salsinha dehan selebrasaun tinan ne’e hanesan grasa ida ne’ebé ema hotu hetan husi Nai Maromak nia bensaun tomak hodi akompaña ema hotu nia moris.

“Agradese ba di’ak tomak husi Maromak, akompaña ita avó Xanana, domin ida ne’e hanesan aliansa ida ita sukat labele, dala ruma ita sente hamnasa, sente hamnasa no dala ruma ita sente la simu, maibé Maromak nia domin no kbiit maka fó grasa mai ita, atu ita tane nafatin ho rohan laek hodi simu moris ne’e ho grasa boot,” nia hatete.

Padre Angelo hatutan, Lider Karismátiku, Xanana hakat liu ona dezafiu barak iha nia moris hasoru sofrimentu oin-oin, maibé nu’udar sarani Xanana mós nunka haluha atu hato’o orasaun agradese ba Maromak nia grasa tomak.

“Iha ita nia moris Maromak sempre koko ita, fó justisa mai ita ho nia domin tama too ema hotu nia laran, hodi komprente saida maka moris ne’e,” nia hatete.

Misa agradesimentu ne’e hetan partisipasaun masimu husi lider partidu politiku husi CNRT, PD, UDT, PLP no konvidadus seluk tan. Hafoin misa, Xanana selebra festa agradesimentu hamutuk ho padre no partisipantes sira iha salaun enkontru Igreja Balide.

 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE