KRIBAS (TOP) – Eleisaun jeral maka nu’udar dalan loos, no dalan lejitimu hodi ka’er ukun iha nasaun demokrátiku nia laran. Demokrásia la hanorin, no nunka hanorin atu halai korta tun-sa’e hodi ka’er ukun no hetan poder. Atu hetan poder, no ka’er ukun, dalan iha ida de’it maka tenke hetan liu husi eleisaun jeral sira, la’os hetan fali liu husi halai korta tun-sa’e.
Povu Timor-Leste tomak sei hasoru eleisaun prezidensial iha tinan 2022, no eleisaun parlamentar sei akontese iha tinan 2023.
Prezidente partidu CNRT, Kay Rala Xanana Gusmão hateten, preparadu ona hodi hasoru laloran boot eleisaun prezidensial nian iha tinan oin, 2022.
“Ita husu boot bá ita-nia rai-lulik atu labele dada tan, iha rai barak halo eleisoens iha Covid-19 nia laran, mais Covid-19 loloos, la’os Covid-19 bosok ten, bosok hela de’it ita, maibé buat ne’e ita lahatene loloos se maka iha se maka laiha,” hateten Xanana bainhira hasoru malu ho komunidade sira iha Suku Kribas, postu Manatuto vila, munisipiu Manatuto, Sesta 29 Outubru 2021.
Komandante em Chefe das FALINTIL ne’e, sadik sidadaun sira hotu atu prepara a’an partisipa eleisaun presidensial iha fulan Marsu tinan oin 2022, hafoin hakat bá eleisaun parlamentár iha tinan 2023.
“Eleisoins ba Prezidente tenki iha Marsu 2022 depois maka ita haree fali eleisoens ba Parlamentu. Ne’e duni maluk sira, ita hotu prepara-aan, ha’u laobriga ema ida atu tama CNRT ka atu mai fó apoiu hotu mai, ha’u la obriga, ita iha demokrasia nia laran, ida-idak maka haree hanoin no hili,” nia esplika.
Eis Primeiru-Ministru ne’e rekoñese durante ne’e ema balun sempre kestiona ninia ukun durante tinan hirak nia laran la halo buat ida, maibé Xanana dehan durante ukun halo mós buat lubuk ida tuir vizaun hanesan ne’ebé luta ba ukun rasik a’an.
“Ha’u husu de’it karik ha’u labele defende katak, husi 2007 mai 2015-2016 ne’e, ami halo buat barak, la’e, ami lahalo ida, lahalo liu, halo maka a’at de’it,” Xanana esplika.
“Husi 2017 mai agora, governu sira foun mesak matenek de’it halo ita haree dezenvolvimentu ne’e la’o, maibé povu maka terus hela de’it, ne’ebé ha’u nia hakoak no domin tomak ba imi, maibé to’o iha ne’eba ida-idak iha nia kakutak atu deside, laiha ema obriga ema ida, iha demokrasia nia laran”.
