DILI (TOP) — Estadus Unidus Amerika investe rihun atus lima ba iha UNICEF hodi prevene Covid-19 iha Timor-Leste.
Embaixadora Estadus Unidus Kathleen Fitzpatrick, USAID nia Diretór Misaun Jim Wright no UNICEF nia Country Representative Valérie Taton hatete aprezenta apoiu finasiamentu ne’e ba Diretora Jerál Ministériu Saúde, Dra. Odete da Silva Viegas.
Ho aumentu apoiu financiamentu ne’e, total apoiu Estadus Unidus nian ba Timor-Leste nia programa prevensaun Covid-19 hamutuk millaun $1.6 husi inisiu apoiu $1.1 millaun.
Kontribuisaun Estadus Unidus nian ne’e mai husi fundu Ajénsia Estadus Unidus ba Dezenvolvimentu Internasionál (USAID) ba prevensaun no responde ba Covid-19. Fundu ne’e sei uza ba kampaña informasaun, interasaun komunitária, kontrolu infesaun no fornesimentu be’e no saneamentu iha postu saude sira iha munisípiu balun.
“Ijiene ne’ebé di’ak ne’e importante tebes iha situasaun saida de’it espesiálmente bainhira luta hasoru COVID-19,” hatete Embaixadora EUA Fitzpatrick liu husi komunidade ba imprensa ne’ebé The Oe-Kusi Post asesu, Kuarta 03 Juñu 2020.
“Fundu ne’e sei ajuda UNICEF garante postu saúde sira iha Timor-Leste bele fornese bee moos no saneamentu ne’ebé própriu ba sira nia komunidade. Estadus Unidus orgullu hodi lidera mundu luta hasoru pandémia ne’e no kontente ho parseria hamutuk ho UNICEF no Ministériu da Saúde ba luta ida ne’e iha Timor-Leste.”
Pandémia COVID-19 hanesan perturbasaun bo’ot iha moris labarik no sira nia família iha Timor-Leste,” hatete UNICEF nia Reprezentativu Valérie Taton.“UNICEF hare parseria ho USAID nudar oportunidade dia’k tebes ba hare impaktu husi pandémia ne’e, nomos servisu iha sistema ida ne’ebé bele benefísia labarik no nia familia ba tempu ne’ebé naruk.”
Ho apoiu husi Estadus Unidus, UNICEF implementa estratéjia hodi kontinua prevene COVID-19 liu husi kampaña informasaun ba komunidade sira, hadi’a bee no saneamentu no fornese ekipamentu ne’ebé nesesáriu ba iha postu saude, no uza baze de dadus hodi hadiak servisu saude hodi responde ba COVID-19. Servisu ne’e sei hala’o iha komunidade no postu saúde iha munisípiu Baucau, Covalima, Dili, Ermera, no Manatuto.
Estadus Unidus kontribui ona millaun ida pontu neen ba Timor-Leste hodi luta hasoru COVID-19. Servisu liu husi organizasaun oi-oin, inklui USAID nia Projetu Hakbi’it Servisu Saúde Báziku no UNICEF, osan ne’e hodi ajuda governu prepara sistema laboratóriu, deteta kazu, apoiu asisténsia espertu tékniku, risku komunikasaun, no prevene tranzmisaun COVID-19 liu husi programa sira seluk.
