Oekusipost.com Dili – Nasaun barak iha mundu ohin loron balun deklara emerjénsia no balun deklara izola a’an total hodi preve propagasaun pandemia Novel Coronavirus Disease 2019 (CorVid-19), maibé situasaun ne’e la satan traballador Timoron sira iha Korea Sul.
Trballador Timoroan ida iha Korea Sul, Domingos Ulan hateten, nia sente pániku duni, maibé lorloron tenke tama serbisu hanesan tempu normal, tanba nesesidade mak obriga, no dalan atu mai Timor mós susar.
“Ami tauk no pániku hanoin atu fila ba ita nia-rain hodi hamutuk ho familia, maibe agora aeroportu barak mak taka, entaun difikulta ami,” hatete Domingos via chatting Facebook ba Oe-Kusi Post.
"Razaun seluk bainhira mak ami obriga a’an atu fila ba Timor mak kona fali virus ne’e, guvernu Korea foti desijaun sei la simu ami, ida ne'e mak lakohi fila ba Timor," esplika nia.
Nia konta katak, governu Korea halo prevensaun maka’as tebes ba nia sidadaun husi virus corona ne’e, no ikus mai númeru infetadu oras ne’e menus ona kompara iha tempu hirak liuba sa’e maka’as tebes.
Iha fatin sira hanesan Busan (Gerang-Dong) ne’e do’ok tebes husi fatin afetadu sira iha Korea laran. No Timoroan hamutuk nain tolu mak serbisu iha fabrika ida iha fatin ne’e.
"Iha fabrika ami serbisu ba, kompostu husi nasaun hitu (7), Timoroan nain 3, Nepal ema nain 5, Uzbekistan nain 12, Pakistaun nain 8, Yaman nain 7, Rusia nain 2 no Korea nain 24,” nia konta.
Entretantu, dadus husi Organizasaun Mundial ba Saúde ne’ebé fó iha loron 31 Marsu 2020 rezista kazu hamutuk 9,786 no ema nain 162 mak mate tiha ona.
