DILI (TOP) – Governu liu husi Sentru Jestaun ba Krize Covid-19 haruka ekipa ida ba derepente iha sala izolamentu Vera Cruz iha tuku 3 dadersan ho kareta funerariu ida atu foti sai ona mate-isin Armindo Borges, maibé lakonsege, tanba bainhira ekipa ne’ebé lidera husi komandante polisia superintendente Marcos Sequeira to’o iha fatin ne’e, hare hetan ekipa seguransa eis Primeiru-Ministru, Kay Rala Xanana Gusmão nian mós hader hela, nune’e ekipa ne’e fila-fali ho nonok de’it.
“Ekipa ohin ne’e mai ho komandante superintendente Marcos Sequeira. Sira mai kompletu ho kareta funerariu ida ho intensaun atu foti sai ona mate-isin ne’e, maibé derepente sira fila nonok de’it,” haktuir deputada CNRT, Bendita Magno ba audiensia sira iha sala izolamentu Vera Cruz, Dili Tersa 13 Abril 2021 iha horas tuku 3 dadersan.
Tuir observasaun The Oekusi Post (TOP) iha sala izolamentu ne’e katak, bainhira ekipa ne’ebé lidera husi superintendente polisia Marcos Sequeira to’o iha sala izolamentu Vera Cruz, ekipa seguransa sira inklui seguransa Kay Rala Xanana Gusmão nian mós hader hotu ona, no sira nia prezensa ne’e mós fanun kedas Xanana husi nia toba fatin iha estrada klaran Vera Cruz, maibé la kleur de’it kareta funerariu ne’ebé mai ho ekipa ne’e fila nonok de’it.
“Ne’e imi atu tula ba ne’ebé?,” Xanana husu ba superintendente polisia Marcos Sequeira, maibé nia la hatan ida hodi desidi fila nonok de’it ho nia ekipa ne’e.
Ho akontesimentu ne’e mós Xanana la toba ona hodi tur hein de’it iha portaun izolamentu Vera Cruz nian.
Armindo Borges hakotu nia iis iha Domingu kalan bainhira ekipa ambulansia evakua nia sai husi sala emerjensia HNGV atu ba tau iha sala izolamentu Vera Cruz, Dili, maibé molok to’o ne’eba nia iis kotu ona, tanba sofre moras stroke hemorrhagic.
Notisia relevante: Pasiente stroke hemoragic ida mate iha dalan klaran molok to’o Vera Cruz
Mosu disputa entre familia ho governu kona-ba mate-isin ne’e, tanba familia inklui Kay Rala Xanana Gusmão la simu rezultadu teste swab ne’ebé dekreta matebian ne’e mate, tanba kauza husi moras Covid-19, maibé familia dehan matebian ne’e sofre moras stroke kleur ona, la’os sofre Covid-19.
Notisia relevante: Disputa mate-isin Armindo Borges seidauk iha solusaun no xanana toba hein iha estrada
Hafoin ida ne'e Xanana lidera ekipa ne'ebé hamutuk ho nia hein mate-isin ne'e iha Vera Cruz hahu halo limpeza área ne'e to'o moos iha oras tuku 4 dadersan.
