DILI (TOP) – Prosesu negosiasaun entre lidera Karismátiku, Kay Rala Xanana Gusmão hamutuk ho governu seidauk hetan solusaun final to’o agora relasiona ho matebian Armindo Borges nia isin-mate ne’ebé sei kontinua tau hela iha sala izolamentu Vera Cruz, Dili.
Matebian Armindo husi munisipiu Ermera, maibé durante ne’e hela iha Komoro, no nia sofre nanis ona moras stroke.
Familia sira haktuir katak, matebian foin maka hetan atakasaun iha loron Domingu lorokraik, nune’e sira ba bolu ambulansia iha Sentru Saúde Komoro hodi lori ba Hospital Nasionál Guido Valadares (HNGV) atu konsulta. To’o sala emerjensia iha horas tuku 7 kalan, no médiku sira mós imediata halo Swab Test ho nia durasaun minute 15 fó sai ona rezultadu katak, matebian mós sofre moras Covid-19, maibé familia la simu rezultadu ne’e basa matebian ne’e hetan atakasaun stroke maka lori ba HNGV atu konsulta, la’os sofre moras Covid-19.
Lourdes de Jesus nu’udar oan-feto husi matebian Armindo Borges katak, sira familia tomak diskorda ho rezultadu teste Swab ne’e, tanba durante ne’e matebian sofre moras stroke, la’os sofre Covid-19.
“Corona ne’e kona minute 15 de’it, detekta kona minute 15 de’it ha’u nia aman bele mate ne’e, kasian. Agora nia-isin bubu hotu ona ne’e, kasian nia toba hanesan ne’eba,” esplika Lourde ne’ebé maka lori nia aman ba HNGV no ba Vera Cruz ba The Oe-Kusi Post (TOP) iha sala izolamentu Vera Cruz, Dili, Segunda 12 Abril 2021.
“Ohin dader ha’u sai, ha’u hakneak ba Avo Nana husu ajuda, Avo Nana husu tulun baa mi oan-kiak sira. Ai-kasian imi atu husik de’it nia isin molik ho kalsa badak hatoba de’it nia ka? Covid ne’e detekta minute 15 de’it, nia moras ne’e, nia moras stroke. Ran sai husi tilu, sai husi ibun. Nia laiha moras corona, nia oin ne’e bubu ne’e maka ha’u lori nia mai iha hospital ho esperansa katak ba ne’e di’ak, maibé ba to’o ne’eba ho rezultadu dekteta nia minute 15 de’it nia iha virus corona, ha’u la simu ida ne’e.
Eis Primeiru-Ministru, Kay Rala Xanana Gusmão mós la fiar kedas katak matebian nia mate ne’e, tanba kauza husi moras Covid-19.
“Ha’u la fiar, ha’u la simu, tanba ema ne’e la’os sofre Covid-19. Ha’u sei toba iha ne’e to’o bainhira de’it mós ha’u sei toba hein iha ne’e to’o ha’u foti ona mate-isin ne’e maka foin sai husi fatin ne’e,” esplika Xanana bainhira haksesuk malu ho Ministra Saúde, Health Odete Maria Freitas Belo iha portaun boot sala izolamentu Vera Cruz, Dili.
Xanana hamutuk ho familia matebian sira hakatak ba sala izolamentu Vera Cruz iha loron Segunda 12 Abril 2021 oras tuku 8 dadersan, no to’o oras 11 kalan, Xanana toba de’it iha estrada klaran Vera Cruz.
“Se imi mai foti mate-isin ne’e ho forsa, imi tiru mate uluk ha’u maka ba foti mate-isin ne’e,” esplika Xanana ba Diretur Ezekutivu Sentru Jestaun Krize, Brigadeiru Aluc Descartes, maibé Brigadeira Aluc responta katak, situasaun ne’e la’os atu tiru-malu.
“La’os ema ne’e mate maka ita atu tiru-malu,” responde Birgadeiru Aluc ba Xanana.
Maske mosu situasaun hanesan ne’e, maibé Primeiru-Ministru, Taur Matan Ruak nafatin husu ba pessoal saúde sira atu labele tauk ba presaun husi se-se de’it, no kontinua hala’o serbisu hanesan baiibain.
Durante loron tomak ida, Xanana hatais de’it kalsa badak ida, no hatais faru-mutin ida ho xinelus toba de’it iha estrada klaran Vera Cruz nian. Nia la troka ropa, no la haris ida.
