DILI (TOP) – Molok governu foti desijaun hodi husu apoiu internasional ba vitima dezastre natural sira iha rai-laran, Sekretariu Jeral partidu FRETILIN, Mari Alkatiri deklara ona uluk ona ba públiku.
Durante tinan barak Alkatiri sempre hato’o kritika no protesta maka’as ba Kay Rala Xanana Gusmão katak sempre uja nia "poder informal" ne’e hodi influensia ba poder formal sira, maibé direitamente no indireitamente Alkatiri mós sempre uja nia "poder informal" ne’e influensia sira ne’ebé assume no ka’er poder informa sira.
Notisia ajensia Lusa edisaun 08 Abril 2021, Alkatiri husu ba governu tenke husu apoiu internasional ho urjente ho forma sistemátiku inklui helikópteru militar ida hodi bele evakua populasaun sira ne’ebé iha área izoladu sira iha rai-laran.
Apoiu internasional ne’e, Alkatiri prefere nasaun viziñu sira hanesan Australia, no Nova Zelandia.
Nune’e la kleur de’it, ka iha loron hanesan mós Konsellu Ministru desidi no aprova kedas rezolusaun ida husu komunidade internasional sira atu tulun governu atual hodi rezolve problema inundasaun ne’ebé akontese iha semana kotuk.
Desijaun Konsellu Ministru nian ne’e mós suspende impozisaun konfinamentu domisiliariu jeral ba populasaun sira iha munisipiu Dili, no deklara Estadu Kalamidade durante loron 30 nian laran, maibé mantein impozisaun serka sanitária ba munisipiu Baukau no Vikeke durante semana ida tan.
Dadus husi Sekretadu Estadu ba Protesaun Sivil, Joaquim José Gusmão dos Reis Martins katak, inundasaun ne’ebé akontese iha semana kotuk rezulta ema kuaje nain 42 maka mate iha rai-laran, no ema hamutuk rihun 10 resin maka oras ne’e sai refujiadu ba sentru akolimentu hamutuk 22 iha Dili laran.
Ema nain 42 ne’ebé mate ne’e kompostu husi nain 22 husi munisipiu Dili, nain 10 iha Ainaro, nain 5 iha Manatuto, nain 3 iha Vikeke, no nain 2 iha Aileu.
