DILI (TOP) – Prezidente Comissão Directiva Nacional (CDN) partidu CNRT, Dionisio Babo Soares hato’o sentidu kondolênsia ba familia matebian Filomena Fátima tantu iha Lago Tasi-Tolu no iha munisipiu Ermera.
“Primeiru, hakarak hato’o sentidu kondolênsia ba familia matebian, no reza atu Matebian nia klamar hetan Fatin diak iha Nai Nia Kadunan Santo”, hateten Dionisio Babo via chatting WhatsApp ba The Oe-Kusi Post (TOP), Sábadu 03 Abril 2021.
“CNRT solidariza ho familia Matebian no maluk hotu ne’ebé hasoru hela situasaun grave ida ne’e. Ita hakfodak rona informação katak matebian Filomena mate tanba hamalaha. Karik ida ne’e maka loos duni, ne’e hanesan sala boot ida no tenki esforsu atu labele mossu tan”, Babo afirma.
Eis Ministru Justisa ne’e katak, CNRT solidariza mós ho estudante no Timor-oan tomak ne’ebé hasoru hela susar, ne’ebé hela iha Dili durante serca sanitária no balun la iha hahan atu bele han.
“CNRT bolu ona atensaun ba governo iha plenária Parlamento kona-ba kuidadu atu aplika medidas serca sanitária, maibé tanba opozisaun CNRT nia lian ema lá rona. Ita hatene katak Primeiru Ministru ho nia governu halo hela esforsu maka’as, maibé presija apoiu hosi membru governu sira ne’ebé tonka hela PM TMR. Tanba ita hare hanesan esforsu PM ho nia partidu nian iha governu ne’e la hetan apoio máximu husi membru governu seluk, tanba kompete malu maka’as, iha aliansa nia laran”.
Eis Ministru Negósiu Estranjeiru no Kooperasaun (MNEK) ne’e katak, CNRT uluk halo ona apoiu liu husi maun Xanana, no agora mós liu husi organizasaun Juventude Partidu ho Movimentu Apoio Xanana halo hela apoiu ki’ik ba maluk sira ne’ebé presija tebes. Medida ne’ebé efikaz liu maka presija fó hahan no mós introduz medida kontrolu sanitáriu atu labele halo povu susar.
Eis Sekretariu Jeral Partidu CNRT ne’e esplika, nu’udar sosiedade ida ne’ebé laiha meiu subsistênsia, governu presija kontrola no serbisu nu’udar ekipa.
Babo rekomenda ba governu devia aloka nafatin fundu ba assistensia individual-familiar, ba ema sira ne’ebé ho kondisaun hela de’it iha uma, liu-liu dezempregadu, estudante sira ne’ebé mai husi foho. Segundu, loke sentru movel sira ba venda produtu konsumo orgâniku husi foho ka nesesidade básika husi Dili ba foho.
“Ida ne’e aru ajuda aplika serca sanitária, ne’ebé la’o hela tiha ona inklui tau postu teste sanitário (swab test) iha pontu entrada/saida ba munisipiu nian maka hanesan Tasi Tolu, Hera, no Lahane, Beduku ho Maloa, nune’e bele fó dalan atu ema bele fila ba foho”.
Babo dehan, iha tempu udan ne’e, dezastre natural bele mosu derepente. Presija iha medida antesipada no movimentasaun trator ho pessoal hodi prepara. Governu liu-liu ensinu superior kria no fó pakote internet gratuita ba estudante sira ne’ebé bele fasilita prosesu aprendizajen on-line, tanba agora prosesu ensinu tersiária abandonadu.
Nia fó hanoin, tempu agora se bele medida sira ne’e tenki halo husi apoia governu ho PM rezolve krize ne’e. CNRT solidariza ho estudante sira ne’ebé mai husi foho ho povu tomak no hatudu ona durante tinan 10 serve povu ho di’ak maski seidauk maximu. Maibé, CNRT iha lideransa maun Xanana halo maximu possível atu halo povu nunka bele terus tan.
“Tanba ne’e husu atu fulan rua ka tolu ne’e governu apoia orsamentu itoan hodi selu sira nia propinas universidade nian. CNRT rekoñese katak ita labele iha tempu eleisaun de’it maka ba husu povu fó votu ba ita hodi hetan salariu boot no naran boot, maibé kuandu sira terus ita ajuda matan-sorin de’it. Ita nunka bele husik labarik estudante sira ho povu sira hasoru situasaun hanesan agora ne’e!”.
Filomena Fátima husi munisipiu Ermera, durante ne’e hela iha Lago Tasi-Tolu, Komoro, Dili, ikus mai desidi tara a’an rasik, tanba kauza husi hahan laiha. Loron rua molok tara a’an nia ba husu foos lata-rua iha nia viziñu sira. Viziñu sira fó sasin katak nia hahu tara aan iha Kinta kalan, no foin hetan iha loron Sesta feira Santa, no hakoi ona iha semitériu Masin-Lidun, Tasi-Tolu, Komoro, Dili iha loron Sábadu 03 Abril 2021.
