DILI (TOP) – Prezidente CNRT, Kay Rala Xanana Gusmão orienta ona membru governu no fó nafatin konfiansa ba deputadu sira ne’ebé mai husi partidu CNRT atu defende nafatin legalidade iha Parlamentu Nasionál, no membru governu sira sei sai hotu ona husi estrutura governu atual iha loron Segunda 25 Maiu 2020.
Notisia relevante: CNRT sai ona husi governu atual
“Husu ba militante no simpatizante partidu CNRT nian tomak iha rai-laran atu tuur hakmatek. CNRT tenke hakmatek, tanba agora ne’e kestaun…ita atu dehan katak kestaun ne’e kestaun konstitusional no kestaun legal ninian. La’os ho fali manifestasaun ka ho fali saida ka, ne’e laiha,” Xanana hateten liu husi konferénsia ba imprensa iha sede partidu CNRT iha bairro Grillos, Sábadu 23 Maiu 2020.
Xanana triste tebes, CNRT nu’udar partidu triste tanba tuir Xanana nia hare katak Estadu ne’e pilar ha’at ne’ebé ka’er hela Timor-Leste.
“Ita nia Estadu tuir ita nia tradisaun katak ai-rin ha’at ba uma lulik Timor ne’e, susar ona, hotu-hotu nakdoko. Ita hein hela katak justisa ne’e nu’udar ai-rin ida ne’ebé metin itoan, maibé justisa mós hatudu ona katak ita atu la fiar tiha ba lei. Ami husi partidu CNRT respeita tebes juiz sira, maibé ho sira nia hatudu mai ami lei iha Timor ne’e halo ami la fiar tiha ona”.
