DILI (TOP) – Tribunal Rekursu indefere ona petisaun ne’ebé asina husi deputadu nain 19 husi partidu CNR nain 18, no UDT/FM nain ida kona-bá husu fislizasaun abstratu ba desijaun Prezidente Repúblika, Francisco Guterres Lú Olo nian durante ne’e nia desijaun sira tuir de’it konstituisaun RDTL ka la’e.
Petisaun kontra PR Lú Olo hatama husi advogadu Manuel Tilman ba TR iha loron 5 Maio 2020 iha oras dadersa n, no liu de’it loron balun TR devolve tan petisaun ne’e ho rajaun tenke hetan aprovasaun husi deputadu nain 43 ka 2/3 iha Parlamentu Nasionál, maibé husi parte CNRT responde hikas karta ne’e katak, petisaun ne’e la’os ho intensaun atu halo impeachment ba PR, maibé atu husu de’it ba TR hodi halo fiskalizasaun abstratu ba PR nia desijaun sira durante ne’e tuir de’it konstiusaun RDTL ka la’e.
“Agora mosu tan ona, ami nia advogadu Manuel Tilman simu ona katak petisaun ne’ebé ami halo ba ne’e la vale hotu. Ita nia Estadu Direitu Demokrátiku ne’e atu ba ne’ebé? Tanba ne’e mak CNRT hakarak re-afirma iha ne’e ba maluk sira hotu, maluk ne’e maluk CNRT nian, ami la obriga ema ida atu tuir ami, ba militante CNRT nian hotu atu kalma ho hanoin nafatin katak ita defende lia loos no ita sei defende Estadu Direitu Demokrátiku,” Xanana hateten liu husi konferénsia ba imprensa iha sede partidu CNRT iha bairro Grillos, Sábadu 23 Maiu 2020.
Notisia relevante: Deputadu Nain 18 Keixa Ona PR Lú Olo ba TR
Maske situasaun ne’e halo Prezidente Partidu CNRT, Kay Rala Xanana Gusmão sente triste tebes, maibé Xanana nafatin husu ba militante no simpatizante CNRT nian iha rai-laran atu tuur hakmatek hodi kontinua la’o tuir prosesu legal sira no hakruk de’it ba konstituisaun haruka to’o fali tempu ruma povu mak desidi iha eleisaun jeral sira.
