Oekusipost.com Dili – Koaligasaun foun ne’ebé kompostu husi partidu tolu (3) planeia ona hodi “sobu” tiha estrutura meja Parlamentu Nasionál, maibé Prezidente Parlamentu Nasionál (PPN), Arão Noe de Jesus Amaral lakohi fó komentariu ba assuntu ne’e.
Bankada Parlamentár kompostu hosi Partidu Libertasaun Populár (PLP), Kmanek Haburas Unidade Nasionál Timor Oan (KHUNTO) no Frente Revolusionária Timor-Leste Independente (FRETIILIN) sei hatama pedidu destituisaun hasoru kompozisaun meza atuál Parlamentu Nasionál.
“Se i ba iha ne’ebá. Mosaun destituisaun tenke iha hodi fó apoiu ba VIII Governu tenke iha mudansa iha meza parlamentu nian, semana ida-ne’e ita aprezenta ona mosaun de destuituisaun ba meza Parlamentu Nasionál nian. Buat sira ne’e halo tanba postura polítika muda. Destituisaun ne’e fásil loos, halo de’it abaixu assinadu, aban aprezenta ba Prezidente Parlamentu Nasionál,” Vise-Xefe Bankada Parlamentár PLP, Deputadu Francisco de Vasconcelos hateten ba jornalista sira iha edifisiu Parlamentu Nasionál, Dili Segunda 4 Maiu 2020.
Vise-Xefe Bankada PLP ne’e hatutan, deputadu na’in-10 hosi bankada FRETILIN, PLP no KHUNTO mak sei asina pedidu ne’e hodi aprezenta ba Prezidente Parlamentu Nasionál, Arão Noé de Jesus da Costa Amaral.
“Ejizénsia polítiku mak obriga tenke halo, rejimentu parlamentu hatete Prezidente Parlamentu Nasionál bele renúnsia nia mandatu, ida seluk mak liuhosi mosaun destituisaun ne’e. Ha’u haree ohin mós plenária laiha ajenda entaun sinál la di’ak,” nia afirma.
Nia haktuir, ajenda iha semana kotuk iha maibé Prezidente Parlamentu Nasionál kansela ajenda ba plenária ne’e.
“Posibilidade orsida ami hatama ona,” nia hatenten.
Iha parte seluk, rejimentu PN iha artigu 20 kona-bá renúnsia katak membru meja sira bele renúnsia, no alinea segundu kona-bá destituisaun katak membru meja sira bele halo destituisaun.
Maske rejimentu PN ne’e fó dalan, maibé politikamente sei han prosesu lubuk ida mak foin bele akontese.
Bainhira tenta konfirma assuntu ne’e ba Prezidente Parlamentu Nasionál, Arão Noe de Jesus Amaral, maibé lakohi fó komentariu.
