Oekusipost.com Dili – Advogadu Manuel Tilman ho advogadu Miguel Acacio Faria hatama ona petisaun kontra Prezidente Repúblika, Francisco Guterres Lú Olo ba Tribunal Rekursu ohin tuku 9 dadersan.
Advogadu Manuel Tilman hateten, petisaun ne’e asina husi deputadu ka reprezentante povu nain 18 iha Parlamentu Nasionál.
“Deputadu nain 18 mak asina petisaun ne’e no sira fiar ha’u lori petisaun ne’e mai iha Tribunal Rekursu,” hatete advogadu Tilman ba jornalista sira iha Tribunal Rekursu (TR), Kaikoli-Dili, Tersa 5 Maio 2020.
Entretantu, antes ne’e, Prezidente partidu CNRT, Kay Rala Xanana Gusmão esplika petisaun ne’ebé hatama ba Tribunal Rekursu ho intensaun atu ba jerasaun futuru sira mai tenke aprende halo didi’ak hodi defende no ka’er metin nafatin Estadu Direitu Demokrátiku.
Notisia relevante: Semana Oin Partidu 5 "Kontra" Prezidente Lú Olo
“Ita atu hatama asaun ida ba Tribunal,” hateten Xanana liu husi konferensia ba imprensa iha sede partidu CNRT iha bairo Grillos Dili, Kinta 30 Abril 2020._
“Ohin, ami ho advogadu sira, ita atu hatama asaun ida iha tribunál para ita-nia sosieadade maioria jovens hodi hatene. Ita ohin loron tama iha krize institusionál. Konteudu hosi karta petisaun sei haruka ba Tribunál hodi bele haree ninia legalidade sira tuir Konstituisaun RDTL,” Xanana esplika hodi liman karuk ka’er no hatudu hela petisaun ho mahar boot id aba jornalista sira.
Xanana argumenta, problema nia hun durante ne’e, la’ós tanba nia mak atu ba assume tan kargu primeiru-ministru ka tanba partidu KHUNTO sai tan husi koaligasaun AMP, maibé problema nia hun mak iha Ai-Tarak Laran no atu ukun nasaun ne’e labele hare de’it ba sapatu laran, maibé tenke hare mós ba esperiensia nasaun barak iha mundu ne’ebé hetan independensia kleur ona, maibé ohin loron konflitu la hotu hela de’it, tanba hadau malu ukun no poder ne’ebé la tuir konstituisaun haruka. La respeita ona konstituisaun.
Ekipa advogadu ne’e simu direita husi Prezidente Tribunal Rekursu, Juiz Deolindo dos Santos. Liu tiha ida ne’e, ekipa advogadu sira mós rejista kedas petisaun ne’e ba iha parte sekretariadu.
