Oekusipost.com Dili – Loron Mundiál ba Liberdade Imprensa hahu kedas tinan 1993, Asembleia Jeral Nasões Unidas proklama ona loron 3 fulan Maiu nu’udar loron mundial ba liberdade imprensa nian. Konstitusaun RDTL mós garante Liberdade Imprensa liu-liu iha artigu 40 ba Liberdade Espresaun no Informasaun no artigu 41 ba Liberdade Imprensa no media massa.
Assembléia Jeral Nasões Unidas dekreta loron ohin hodi hasa’e konsiensia ba importansia liberdade imprensa no fó hanoin ba governu ba sira nia dever tenke respeita no defende direitu liberdade imprensa no liberdade espresaun ne’ebé halulik iha artigu 19 husi Deklarasaun Universal Direitu Umanu 1948 ne’ebé marka aniversariu Deklarasaun Windhoek, nu’udar deklarasaun prinsipiu imprensa livre ne’ebé reuni husi jornalista husi jornal Afrikanu sira iha Windhoek iha tinan 1991.
Ohin JORNALISTA sira iha MUNDU TOMAK inklui iha TIMOR-LESTE komemora Loron Mundial ba Liberdade Imprensa iha hela krize boot nia laran, tanba kauza husi pandemia virus corona (COVID-19). Reporters Without Borders fó sai indise Liberdade Imprensa Mundial 2020 iha loron 21 Abril liuba, observa katak governu autoritáriu sira uja virus corona hodi implementa medida “dutrina halo hakfodak” (shock doctrine) ne’ebé labele implementa iha tempu normal sira.
Ses tiha husi assuntu ne’e, liga ba Loron Mundial Liberdade Imprensa nain, jornalista sira iha Timor-Leste liliu jornalista sira husi media privadu oras ne’e hasoru hela situasaun difisil oioin. Ida mak kompañia media boot sira ko’alia tiha ona jornalista sira nia saláriu bainhira Estadu foin mak aplika Estadu emerjénsia semana rua iha fulan kotuk. Saláriu jornalista sira kuaje maioria $150 kada fulan, no balun la to’o $150, maibé media nain sira tenke ko’a ho rajaun kompañia media sira nia rendimentu tun maske durante tinan hirak ba kotuk simu hela de’it subsidiu husi governu. Úniku Jornal ida mak la ko’a nia jornalista sira nia saláriu maske hasoru hela situasaun difisil ne’e.
Peskiza South East Asia Journalist Union (SEAJU) tinan 2019 no International Federation of Journalists (IFJ) analiza traballador media hamutuk 49 iha Timor-Leste. Peskiza ne’e revela katak respondente por sentu 63 konsidera katak situasaun media iha nasaun ne’e “signifikamente di’ak” durante fulan 12 nia laran. Maske perspetiva positivu, peskiza deskobre ameasa balun sei iha hela. Saláriu menus no kondisaun servisu konsidera nu’udar ameasa prinsipal ba liberdade imprensa (haktuir responde por sentu 41), tuir fali mak ameasa tarjetu atake ba jornalizmu (por sentu 20). Lei media nasaun ne’e, número 5/2014, artikula kompromisiu Estadu ba liberdade imprensa.
Komitmentu ne’e refleta iha resposta peskiza, ho por sentu 84 jornalista ne’e klasifika esforsu governu “aseitável”, maibé “presija hadia”. Lei ne’e rasik nu’udar demostrasaun ida husi vontade politika governu, maske sei presija implementasaun ida efetiva. Maske Timor-Leste nia índise liberdade imprensa internasionalmente a’as liu nia nasaun viziñu sira, realidade la dun hatudu naroman. Jornalista sira kontinua hasoru problema barak iha sira nia kna’ar lorloron.
Asesu ba informasaun nu’udar aspetu profisional importante ba jornalista sira, tulun sira produz notisia klean (in-depth reporting), klaru, balansu no informadu ho di’ak. Maske nune’e, problema boot ida ne’ebé jornalista sira iha Timor-Leste kontinua hasoru mak mukit asesu ba informasaun krusial no dokumentu sira. Governu ka’er monopóliu iha informasaun, regularmente lakohi fó dokumentu ba media. Partikularmente, informasaun ne’e inklui proposta hosi kompañia sira ne’ebé partisipa iha lisitasaun projetu governu nian, no dala barak ladun hetan kontrolu husi media. Maske hafoin prosesu konkluzaun no foti desijaun iha ona mós, media sira la asesu ba dokumentu relevante sira. Iha rajaun lubuk ba ida ne’e. Fonte balun seidauk komprende no intende didi’ak papel media, no iha kazu balun, autoridade sira ladun fiar a’an hodi fó informasaun tanba tauk orsida bele lakon sira nia servisu. Iha saida mak hatudu nu’udar tentativa ida hodi halakon korupsaun, autoridade sira balun reklama – ladun klaru – katak informasaun ne’ebé sira iha nu’udar segredu Estadu.
Ikus mai, liberdade imprensa bele garantia ho esforsu global ida koordenadu, hasa’e (aumenta) públiku nia konsiensia no foku ba vantazen tempu naruk husi mundu ne’ebé krítiku. Loron Mundial ba Liberdade Imprensa ohin ho objetivu atu halo ida ne’e ho tema “Jornalista Latauk ka Favor”. Ida ne’e husu konsiensia ba kestaun spesifiku sira kona-bá seguransa ba jornalista sira, jornalista nia independensia husi poder politika no komersial no mós igualdade jeneru iha aspetu hotu iha media laran.
Kon-bá kestaun ne’e, Asosiasaun Jornalista Timor-Leste (AJTL) ne’ebé sai mahon ba jornalista sira, kongratula jornalista Timoroan sira hotu ih arai-laran ne’ebé maske hasoru difikuldade oioin iha sira nia serbisu lorloron, maibé jornalista Timoroan sira kontinua halo esforsu hodi hakonu direitu públiku liu husi hato’o informasaun ba públiku.
“AJTL uza oportunidade komemorasaun Loron Mundiál Liberdade Imprensa ne’ebé monu iha 3 Maiu, hodi kongratula jornalista no kanál mídia hotuhotu ne’ebé durante ne’e kontribui ona ba dezenvolvimentu nasionál no prosesu harii paz no demokrasia iha país ne’e liuhusi publikasaun notisia no programa relevante sira,” hateten Prezidente AJTL, Zevonia Vieira liu husi konferensia ba imprensa iha Farol, Dili Domingu 3 Maiu 2020.
Atual editora NEON METIN ne’e, husu ba jornalista no media hotu atu kontinua halo kobertura ba asuntu propagasaun COVID – 19 ne’ebé dadauk ne’e sai ameasa boot ba vida umana iha mundu tomak no tenke nafatin kumpri Kódigu Diontolójika ne’ebé iha no tane-aas nafatin prinsípiu jornalizmu cover both sides (kobre parte rua).
“Jornalista no media hola papél importante tebes iha situasaun ne’e tamba bele informa no eduka sidadaun sira atu halo asaun preventiva hasoru virus korona no luta hasoru informasaun falsu sira ne’ebé ema iresponsavél sira lansa mídia sosiál,” afirma Zevonia.
“Mídia hola papél importante tebes atu trazmite no publika informasaun sira edukativu, nune’e sidadaun sira bele prevene propagasaun virus korona ne’e. Jornalista no mídia tenke luta hasoru mós hoax no fake news sira ne’ebé espalla iha mídia sosiál atu redus situasaun pániku iha sosiadade nia leet. Liuliu informasaun falsu sira iha relasaun ho asuntu COVID – 19 ne’ebé la’os mai husi fonte sira kredivel,” nia haktuir.
Zevonia mós husu ba jestaun no mídia-na’in sira atu nafatin garante jornalista sira nia “bem estar” ka kesejateraan no husu atu labele koa jornalista sira ninia vensimentu no saláriu iha tempu dfisíl ida-ne’e tamba sira kontribu diretamentu ba kresimentu ekonónia kanál mídia sira nian durant ne’e.
AJTL nu’udar organizasaun mahon ba jornalista Timor-Leste ne’ebé durante ne’e kontribui ona ba liberdade imprensa no hametin kompeténsia jornalista sira nian liuhusi formasaun lubuk ida no halo advokasia ba jornalista sira iha tempu ne’ebé sira hasoru problema.
Asosiasaun ne’e mós harii kooperasaun no halo parseria ho organizasaun no ajénsia lubuk ida, tantu iha railaran no railiur, hanesan SEAPA, IFJ, UNESCO, AJI, UNDP, Conselho Imprensa (CI), Renetil, TLPU no kanál mídia hotuhotu ne’ebé ezisti iha Timor-Leste.
