Xanana: tenke halo auditoria ba Cesta Básica bainhira hetan vitoria

FAROL (TOP) – Prezidente partidu CNRT, Kay Rala Xanana Gusmão hateten, bainhira hetan konfiansa husi povu iha eleisaun parlamentar iha loron 21 Maiu 2023 sei ezije tenke halo prosesu auditoria ba lala'ok ezekusaun programa Cesta Básica.

“Tanba ita ko’alia bebeik Cesta Básica ne’e mak foin lalais sira sunu tiha ona Coby House Estatal nian ne’e, maibé bainhira manan tiha eleisaun tenke halo auditoria hodi husu responsabilidade,” Xanana hateten kestaun ne’e durante konsolidasaun partidu CNRT nian iha Farol-Dili, Kinta 13 Abril 2023.

Xanana mós kestiona lala’ok ezekusaun fundu Covid-19 ne’ebé durante tinan 2021 to’o 2023 laiha transparansia.

“Kuandu CNRT nia ema ida mak sosa USB ida ho nia folin U$3 de’it ne’e tama kedas on aba prijaun, maibé agora osan gasta arbiru de’it ne’e KAK ho Tribunal nonok de’it. Depois manan ita tenke hamoos tiha sira,” Xanana afirma.

Prezidente partidu CNRT, Kay Rala Xanana Gusmão.

“To’o Dezembru tenke hamoos hotu kedas hahu husi Ministériu Públiku, KAK no Tribunal nian tenke hamoos hotu kedas, sira tenke independente,” Xanana promete.

Maibé, atu atinze mehi ida ne’e Xanana husu ba militante no simpatizante CNRT nian tantu iha Farol no iha teritóriu nasionál tenke halo esforsu maka’as hodi bele manan maioria absoluta iha eleisaun parlamentar ne’e.

Xanana mós hatutan, la’os de’it atu hadia setor judisiariu nian ne’ebé la’o kleuk tiha ona durante mandatu governasaun Primeiru-Ministru, Taur Matan Ruak ne’ebé tonka husi Sekrtariu Jeral Partidu FRETILIN, Mari Bim Amude Alkatiri, maibé sei halo esforsu maka’as hodi dezenvolve setor ekonomia iha rai-laran bainhira hetan konfiansa mazimu husi povu iha eleisaun parlamentar ne’e.

“Povu atu dezenvolve aan, ekonomia tenke la’o. Sei dezenvolve ekonomia ne’ebé tenke ba to’o iha área rural sira, tanba durante tinan 6 nia laran husi 2017 to’o 2023 ne’e ita la la’o ida,” Xanana esplika.

Bainhira partidu FRETILIN lidera husi Sekretariu Jeral Mari Bim Amude Alkatiri foti desijaun hodi sai viabiliza ka sai “ai-tonka” ba governasaun atual iha tinan 2019, ikus mai governasaun ne’ebé kompostu husi PLP, KHUNTO no FRETILIN desidi foti fundu petroliferu hamutuk millaun U$70 atu hala’o programa Cesta Básica.

Objetivu husi programa Cesta Básica primeiru atu ajuda duni povu sira durante periodu lock down ba pandemia Covid-19, no objetivu ida seluk mak atu hamihis de’it asaun karitativa Xanana nian ne’ebé hala’o antes ona iha teritóriu nasionál.

Programa Cesta Básica ne’e ikus mai fahe de’it hudi dodok, koto fuhuk ba povu sira iha fatin barak iha rai-laran, no a’at liutan montante osan ne’ebé aprova uma kain ida-idak tenke hetan U$ 50, maibé iksu mai kuantidade sasan ne’e la to’o montante osan ne’ebé aprova.

Xanana kestiona osan hamutuk millaun U$70 ne’ebé antes ne’e governu foti husi Fundu Petroliferu hodi hala’o programa Cesta Básica to’o ohin loron governu rasik seidauk aprezenta ninia kontas públiku ba povu tomak iha rai-laran hodi hatene.

“Tanba ne’e ita tenke husu auditoria bainhira ka’er ukun,” katak Xanana.

Atu halo auditoria ba programa Cesta Básica tuir Xanana katak, ne’e la’os atu halo politika odiu no vingansa, maibé tenke halo duni, tanba osan ne’e povu nia osan, la’os ema ida nian.

Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com