DILI (TOP) — Governasaun atual falta de’it fulan hirak nia laran atu remata ona, maibé iha ambisaun mak’as hodi harii (konstroi) Uma ba Kbi’it La’ek (UKL) hamutuk 4000 iha teritóriu nasionál ne’ebé sei gasta osan hamutuk millaun US $71.
Governu liu husi Ministru Administrasaun Estatal (MAE), Miguel Pereira de Carvalho hateten programa Uma ba Kbi’it Laek (UKL) hamutuk uma rihun 4 ne’ebé estadu despeza osan ho montante millaun $ 71 ba suku hamutuk 424 ne’ebé mak eziste iha Timor Leste (TL).
“Programa uma kbi’it laek tinan ida ne’e, estadu halo despeza hamutuk millaun US $71 atu halo uma hamutuk rihun 4 ba suku 424 ba kada suku uma sia balun uma 10 no balun 12,” Ministru Administrasaun Estatal (MAE), Miguel Pereira de Carvalho informa ba jornalista sira hafoin reuniaun konsellu Ministru (KM) iha palásiu governu, Dili, Kuarta 03 Agustu 2022.
Ministru Administrasaun Estatal ne’e esplika, kona-ba modelu uma kbiit laek hanesan ba familia ki’ik halo ba kuartu rua, maibé ba fali familia boot ba kuartu tolu.
Ministru ne’e esplika, benefisiariu uma kbiit laek hamutuk rihun 4 ne’e, identifikadu hotu ona. Sekretariadu tekniku, programa nasionál dezenvolvimentu suku (PNDS) mós hato’o ona proposta mai gabinete Ministeriu administasaun Estatal.
“Atu transfere osan ba iha suku sira, nune’e konstrusaun bele hahu no transferesia osan mos haruka tiha ona ba suku sira. Agora ne’e, akontese iha munisipiu sira prosesu atu halo konstrusaun,” nia akresenta.
Nia hatutan, tuir planu kalendariu ba uma kbiit laek ne’e dentru fulan tolu-fulan haat uma hamutuk rihun 4 sei konkluidu konstrusaun to’o 100%. Agora uma kbiit laek la’os deit iha area urbana maibé iha mós area rurais sira.
“Sira ne’ebé mak iha area urbana babain prosesu konstrusaun lalais no sira ne’ebé mak iha area rurais mak prosesu leba tempu naruk tanba kestaun dalan, transporte no sira seluk tan. Maibé ami optimista katak fin do ano ne’e, uma kbiit laek hamutuk 4 mill ne’e konstruidu hotu,” nia argumenta.
