LAUTEM (TOP) – Maske kandidatu Prezidente Repúblika husi partidu CNRT nian ho nia aliadu sira la manan maioria iha parte leste hanesan Baukau, Vikeke, no Lautem, maibé oras ne’e sira kompromete atu halo serbisu maka’as liutan hodi lori Kay Rala Xanana Gusmão ba Primeiru-Ministru iha eleisaun parlamentar ne’ebé sei akontese iha tinan oin.
Partidu Congresso Nacional de Reconstrução de Timor (CNRT), daudaun ne’e, hala’o konsolidasaun maratona husi munisipiu to’o área remota sira hodi hametin estrutura no prepara an ba enfrenta eleisaun jerál 2023.
Liuhusi konsolidasaun ne’ebé lidera husi Sekretáriu Jerál partidu CNRT nian, Francisco Kalbuadi Lay no hetan akompaña husi kuadru nasionál balun no kuadru partidu CNRT Munisipiu Baukau iha loron Sábadu 30 Jullu 2022, iha Aldeia Hatu-Lete, Suku Triloca, Postu Administrativu Baukau Vila, Munisipiu Baukau, estrutura sira iha baze hato’o sira-nia kompromisu atu serbisu ba partidu CNRT dala ida tan hodi lori prezidente partidu CNRT, Kay Rala Xanana Gusmão ba Primeiru-Ministru iha 2023.
Koordenadór partidu CNRT Munisipiu Baukau, Virgílio Pereira, ba dala-uluk lori estrutura munisipiu to’o baze, hato’o nia agradesimentu ba partidu aliadu sira hanesan Partidu Demokrátiku (PD), FRENTI-MUDANÇA, União Demokratico Timorense (UDT), Partidu Sosialista Timor (PST) inklui movimentu h organizasaun masa sira hotu ne’ebé fó ona apoiu ba susesu kandidatura José Ramos-Horta nian, hodi sai duni Prezidente Repúblika liuhusi eleisaun demokrátiku, foin lalais ne’e.
“Tenke hatudu nafatin iha eleisaun parlamentár iha 2023 hodi lori Kay Rala Xanana Gusmão ba PM dala-ida tán,” Virgílio Pereira liu husi seremónia agradesimentu no konsolidasaun partidu CNRT iha loron Sábadu, iha Aldeia Hatu-Lete, Suku Triloca, Postu Administrativu Baukau Vila, Munisipiu Baukau.
Nia hatutan, laloran boot no todan ida tan iha oin daudaun ne’e mak eleisaun parlamentár 2023 tanba ne’e presiza timoroan hotu nia sakrifisiu atu bele lori duni Kay Rala Xanana Gusmão ba tuur iha Palásiu Governu nu’udár Xefe Governu nian iha 2023.
Koordenadór CNRT Munisipiu Baukau ne’e, husu ba estrutura tomak hahú hosi munisipiu ba to’o Postu Administrativa Vemasse, Venilale, Baukau Vila, Laga, Baguia ho Quelicai, atu fó liman ba malu serbisu ba povu nia esperansa mak Xanana fila ba ukun iha governu.
Durante serimónia agradesimentu ba vitória eleisaun prezidensiál no abertura konsolidasaun partidu CNRT nian ne’e, Virgílio Pereira, agradese ba veteranu sira iha Munisipiu Baukau hanesan, Alin-Laek, Aderito Domin, Berdú, Derok-Masin ho seluk tán ne’ebé kontinua kontribui ba timor nia di’ak no timor nia progresu.
Tuir koordenadór CNRT Baukau ne’e katak, susesu lori Ramos-Horta sai PR hodi ba tuur iha Palásiu Prezidensiál, la’ós estrutura nasionál no munisipiu mesak, maibé mós esforsu no serbisu maka’as hosi estrutura tomak hahú kedan hosi baze.
Rezultadu apuramentu nasionál husi Komisaun Nasionál ba Eleisaun (CNE) ne’ebé Tribunál Rekursu valida hatudu katak, Ramos-Horta nu’udár kandidatu Prezidente Repúblika (PR) ho númeru sorteiu 1, manan ho totál votu 398.028 (62,1%), no kandidatu PR númeru 2, Francisco Guterres Lú-Olo hela de’it ho votu 242.939 (37,9%).
Totál votu nulu iha apuramentu ne’e, hamutuk rihun-lima (5.000) no konsege halo kontajen, verifikasaun iha votu 1.200 mak sai válidu, hodi aumenta ba kandidatu na’in-rua nia votu mak hanesan Ramos-Horta hetan atus-ualu-resin (800-resin), Lú-Olo hetan atus-haat-resin (400-resin).
Enkuantu totál eleitór hamutuk 859.925, ema ne’ebé tuir vota hamutuk 646.389, votu válidu 640.967 (99,16), votu branku 1.643 ( 0,25%), votu nulu 3.734 ( 0,58%) votu rezeitadu 28 (0,00%) no votu abandonadu iha 15.
Hafoin remata atividade konsolidasaun iha Baukau vila, ekipa CNRT mós kontinua hakat ba suku Lakuliu Postu Administrativu Kelikai. Militante no simpatizante sira iha suku Lakuliu ne’e mós kompromete atu kontinua hametin sira nia filleira iha partidu CNRT ho objetivu ida de’it atu lori tan Komandante em Xefe das FALINTIL, Kay Rala Xanana Gusmão ba kargu Primeiru-Ministru iha eleisaun parlamentar tinan oin.
Afirmasaun hanesan mós hato’o husi militante no simpatizante CNRT nian iha munisipiu Lautem.
Entretantu, Sekretariu Jeral Partidu CNRT, Francisco Kalbuadi Lay hato’o agradesimentu ba estrutura partidu CNRT nian iha baze liliu ba fiskais sira ne’ebé hala’o serbisu maka’as tebes durante eleisaun prezidensial iha ronde dahuluk to’o ronde daruak ho di’ak tebes.
Nia mós hato’o agradesimentu ba grupu movimentu oioin inklui partidu politiku sira seluk ne’ebé hamutuk ho partidu CNRT hodi konsege lori ona José Manuel Ramos-Horta ba Prezidente Repùblika ne’ebé simu tiha ona posse iha loron 20 Maiu 2022.
“Agradese ba ita boot sira hotu, no agora mai ita serbisu maka’as dala ida tan hodi hasoru eleisaun parlamentar iha tinan oin,” hateten Kalbuadi.
Nia hatutan, ema balun to’o oras ne’e sei konsidera partidu CNRT ne’e nu’udar partidu ki’ik ida, maibé sira mós keta haluha katak, CNRT ne’e mós nu’udar partidu boot ida ne’ebé iha ona esperiensia ka’er ukun iha Timor-Leste.
