DILI (TOP) — Prezidente Repúblika, José Manuel Ramos-Horta konfirma ona sei partisipa iha programa jornada nasionál juventude katolika ne’ebé sei hala’o iha Diocese Maliana iha fulan Agostu tinan ida ne’e.
Prezidente Ezekutivu Komisaun Nasionál Juventude Katolíka Timor Lorosa’e, Pe. João Soares hateten, programa jornada nasionál juventude katolíka ne’ebé sei hala’o iha parókia Maliana durante loron lima iha fulan Augostu, no hetan ona konfirmasaun husi xefe estadu, José Ramós Horta katak nia disponível hodi partisipa iha eventu ne’e.
“Informa ba xefe estadu kona-ba jornada nasionál juventude katolíka nian ne’ebé sei hala’o iha parókia Lolotoe, oras ne’e krús joven iha ne’ebá, no grasa a deus eselensia xefe estadu konfirmadu katak sei partisipa mós iha jornada ne’e ne’ebé sei hala’o durante loron 5 nia laran hahú husi 21 to’o 25 Augostu tinan ida ne’e,” Pe. João hateten ba jornalista sira hafoin enkontru ho xefe estadu iha palásiu prezidensial Aitaraklaran Bairrupíte-Dili, Kuarta 27 Jullu 2022.
Prezidente ezekutivu komisaun nasionál juventude katolíka timor lorosa'e, Pe. João Soares hamutuk ho membru komisaun ko'alia hela ba mídia iha palasiu prezidensial, Kuarta 27 Jullu 2022. Foto TOP/Ezequias Tomás
Nia espera katak ho sorumutu ne’e, opiniaun no idea ne’ebé xefe estadu hato’o, sai hanesan kontribuisaun boot tebes ba atividade ne’e, hein katak ho xefe estadu ninia disponibilidade ho dispozisaun tomak atividade hotu bele la’o ho di’ak liután.
“Nune’e mós xefe estadu nia lia-menon ba komisaun juventude katak, kuandu iha asuntu juventude ninian nafatin kolabora ho xefe estadu, hodi iha kualkér momentu ne’ebé mak komisaun presiza ko’alia em termu asuntu juventude nian xefe estadu prontu nafatin atu atende.”
Iha jornada nasionál juventude katolíku ne’ebé sei hala’o iha Lolotoe, sei involve reprezentante juventude husi dioseze tolu, grupu arte marsiais, grupu difisiensia, juventude partidu hamutuk hamutuk mós ho juventude universitáriu sira, ho objetivu ida katak tempu ona joven sira durante ne’e solidu ona maibé tenki halo sai solidu liután para bele asegura unidade nasionál ne’e ho di’ak no forte liután.
Tanba, tuir mensajen santo papa Francisco ba sarani katolíku iha mundu tomak katak joven mak igreja no igreja mak joven, signifika katak tenki fó oportunidade barak liután ba joven sira hodi bele fahe esperiensia no hato’o opiniaun ruma liuliu liga-ba fé no konstrusaun estadu. No, hanorin joven sira oinsá bele sai autór domin na’in ba malu liuhusi asaun karidade fahe netik buat ruma tuir posibilidade ba komunidade liuliu família vulneravel sira.
Ikus antes termina, Pe. João mós la haluha nia parte alende informa kona-ba jornada ne’ebé sei hala’o iha Lolotoe, nia informa mós kona-ba preparasaun ne’ebé hamutuk ho kolega sira maka hanesan Pe. Cirilio nu’udar diretór komisaun juventude katolíka arkidioseza, Pe. Indra nu’udar prezidente komisaun juventude katolíka dioseze Maliana, Pe. Flugêncio nu’udar prezidente komisaun juventude katolíka dioseze Baukau.
Serbisu makas ho estrutura koopera mós ho Konferensia Episkopál Timorense (CET), halo preparasaun ba iha jornada mundiál juventude igreja partikular ne’ebé sei hala’o iha fulan Abríl 2023. No mós jornada mundiál juventude katolíka nian ne’ebé tuir planu sei hala’o iha sidade Lisboa-Portugal, iha fulan Augostu tinan 2023.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
