Seremónia abertura konsolidasaun partidu CNRT ne’e dirije husi Sekretáriu Jerál Partidu CNRT Francisco Kalbuadi Lay hamutuk ho koordenador CNRT sira husi munisipiu 13 iha teritóriu nasionál ne’ebé hala’o iha salaun igreja katedral Dili iha loron Sabádu 18 Juñu 2022.
“Ho momentu ida ne’e ofisiálmente hau loke ita nia konsolidasaun atu hametin partidu CNRT ninia abut too iha baze hau loke ho grasa Maromak Nia bensaun ho imi hotu nia suporta ita hotu hotu prontu halo serbisu fiar aan la’o ba oin,” hateten Sekretáriu Jerál Partidu CNRT Francisco Kalbuadi Lay molok loke seremónia abertura konsolidasaun partidu CNRT iha salaun Igreza Katetrál Dili, Sabadu 18 Juñu 2022.
Ho abertura konsolodisaun ne’e, tuir Kalbuadi katak, hahu ohin ba oin hotu-hotu prontu ona tun ba iha baze hodi halo konsolidasaun ba partidu ne’e atu hasoru eleisaun parlamentar iha tinan 2023.
“Ha’u kontente tebes no haksolok tebes bele mai to’o iha fatin ida ne’e hodi hamutuk ho ita boot sira no aproveita tempu ida ne’e, tanba ohin hahu husi SELKOM, Nurep to’o iha munisipiu 12 no RAEOA,” katak Kalbuadi.
Eis Ministru Turizmu no Kultura iha governasaun AMP (2012) ne’e hatutan, ohin iha programa rua. Ida mak agradesementu ba kontribuisaun sakrifisiu buat oi-oin durante eleisaun primeiru ronde no segundu ronde serbisu hamutuk ho movimentu sira no partidu sira hotu konsege hetan duni 62,9% ne’ebé mak lori ona José Manuel Ramos Horta ba tur iha Ai-Tarak laran, nune’e seremónia abertura hametin partidu CNRT iha Baze.
“Ita hotu tenke hatene maun boot Kay Rala Xanana Gusmão dehan Partidu CNRT sai interese nasionál nune’e komesa husi dia 20 mai oin ita nia nai prezidente Dr. José Manuel Ramos Horta sai ona hanesan Prezidente Repúblika ba povu tomak iha Timor Leste,” nia hateten.
Sekretariu Jeral partidu CNRT Francisco Kalbuadi Lay ho Prezidente Repúblika José Manuel Ramos-Horta hasai foto hamutuk iha portu Dili molok hakat ba rai-ketan Oe-Kusi Ambeno iha fulan Marsu liuba. Foto TOP/Raimundos Oki
“Ohin ba oin hare de’it mak serbisu konsolidasaun husi Díli to’o iha baze iha Munsipiu 12 no RAEOA prepara ba eleisaun parlamentár komesa hahu ona,” nia hateten.
Nia dehan, politika iha nasionál entrega tomak ba Prezidente Repúblika, fó tempu ba Prezidente Repúblika buka dialogu ho ema hotu. Partidu CNRT prontu atu serbisu ho sé deit, partidu ne’ebé deit, ema ne’ebé deit ka grupu ne’ebé deit.
“Maibé mak ne’e objetivu ida ho interese nasionál ita ho movimentu ho partidu seluk hamutuk ba interese nasionál. Ita prontu dialogu ita pronto serbisu saida de'it. Fó tempu ba nai prezidente repúblika tanba seidauk to’o loron 100, ita agora prepara aan konsolida masa to’o iha baze ita hotu hotu bele serbisu diak liu tan prepara ba eleisaun parlamentár,” nia afirma.
Iha fatin hanesan Koordenador Partidu Congresso Nasionál Reconstrução de Timorense (CNRT) Munisipiu Díli, Luis Ximenes Caldeira husu ba koordenador sira husi 12 no RAEOA atu kontinua kesi-metin abut iha baze hodi hatúr hikas lider Karismatiku Kay Rala Xanana Gusmão ba iha palásiu governu atu lidera governasaun foun tuir mai.
Koordenador Partidu CNRT Munisipiu Dili ne’e konta, iha momentu ne’e maske tempu liu tiha ona, maibé halo serbisu hamutuk nafatin hodi nune’e bele to’o hetan vitoria hatúr duni maun boot José Manuel Ramos Horta iha Palasiu Prezidensiál, Aitarak laran Dili.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
