DILI (TOP) — Prezidente Repúblika, José Manuel Ramos-Horta delega ona eis Primeiru-Ministru Kay Rala Xanana Gusmão hodi representa Timor-Leste tuir enkontru kona-ba Forum Loron Dezenvolvimentu Uniaun Europeia ne’ebé hala’o iha Burxelas.
Hafoin akompaña Xanana sa’e aviaun Air Asia iha aeroportu internasional Prezidente Nicolau Lobato Komoro-Dili iha loron Sesta 17 Juñu 2022, PR Horta hateten ba jornalista sira katak, nia iha rajaun lubuk mak sai baze fundamental ba nia hodi labele partisipa iha reuniaun internasionál ho nasaun amigu sira, liuliu razaun ne’ebé mak sai baze forte lakohi ba tanba baruk ona hala’o viazen ba ema nia rain.
“Primeiru ha’u foin mak simu posse, foin kompleta fulan ida ne’ebé prioridade absoluta organiza serbisu iha gabinete prezidensial atu iha instituisaun ida forte, segundu situasaun polítika interna no terseiru ha’u mós baruk ona viazen internasionál sira ne’e,” Xefe Estadu Ramos-Horta katak ba jornalista iha aeroportu Komoro-Dili hafoin akompaña líder nasionál Xanana Gusmão ba sa’e avaiun, Sesta 17 Juñu 2022.
PR Horta. Credit: Eujevio Pereira.
Nia hatutan, rajaun seluk tanba rekoñese kapasidade Komandante em Xefe das FALINTIL Kay Rala Xanana Gusmão nian nu’udar líder nasionál no internasional ne’ebé pertenente no kompetente duni atu ba tuur hamutuk ho líder mundial sira seluk iha forum loron dezenvolvimentu Uniaun Europeia nian iha Bruxelas.
“Depois maun boot sei liubá Inglatera reuniaun seluk ida kona-ba fronteira terrestre no marritima entre Indonézia-Timor Lorosa’e ho advogadu sira iha ne’ebá i depois liubá Portugal ximeira oseanu, ne’e ximeira ONU nian, Portugal no Kenya mak organiza, ne’e mós área ne’ebé maun boot Xanana domina 100 porsentu. Tanba ne’e mak, parseria ho maun boot, fatin balun ha’u labele ba, ha’u husu ba maun boot reprezenta lori Estadu tomak nia naran,” PR Horta esplika.
Entretantu, tuir ajenda viajen ne’ebé iha katak atual Xefe Negosiador Prinsipal ba Delimitasaun Fronteira Maritima no Terrestre ne’e sei partisipa uluk eventu fórum loron dezenvolvimentu Uniaun Europeia iha Bruxelas iha loron 18-22 Juñu, hafoin ida ne’e sei hala'o fali viajen ba Londres hodi hala'o reuniaun estratéjika ho Konsellu Jurídiku sira kona-ba Negosiasaun Fronteira rai-maran no tasi nian.
Husi Londres, sei ba Lisboa hodi lidera delegasaun Timor-Leste nian ba Konferénsia Oseanu ne’ebé ONU mak organiza husi 27 Juñu – 1 Jullu hanesan Reprezentante Espesial Prezidente Repúblika nian no Timor-Leste nia Reprezentante Espesial ba Ekonomia Azul.
Xanana Ho ekipa sei hala'o mos atividade sira ne’ebé g7+ mak organiza nu’udar Pessoa Eminente g7+ nian. No tuir planu sei to’o hikas mai Timor-Leste iha fulan jullu nia klaran.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
