DILI (TOP) — Prosesu apuramentu tantu iha Sekretariadu Tékniku ba Administrasaun Eleitorál (STAE) no Komisaun Nasionál ba Eleisaun (CNE) nia rezultadu hatudu, kandidatu Prezidente Repúblika ho númeru sorteiu 14 mak manan iha eleisaun ronde dahuluk, tanba hetan votu validu barak liu kompara ho kandidatu nain 15 sira seluk, maibé rezultadu ne’e la fó haksolok ba Sekretariu Jeral Partidu FRETILIN Mari Bim Amude Alkatiri, tanba laiha lojika kuandu kandidatu Lú Olo lakon iha ronde dahuluk ne’e.
Alkatiri ne’ebé gasta tinan barak moris iha kapital Maputo, Moçambique ne’e protesta kona-ba kandidatu prezidente repúblika Francisco Guterres Lú Olo lakon iha eleisaun prezidensiál ronde dahuluk ne’e, la iha lojika.
Notisia relevante: Alkatiri hahu “fase liman” ba Lú Olo nia derrota
“La iha lojika ba rezultadu ke ita asiste ona, iha votasaun prezidensiál primeira volta bainhira iha fraude, laiha fraude no laiha lojika maibé dezafiu boot ida ba ita hotu iha plata forma de entendimentu ho aliadu sira,” Alkatiri hato’o kestaun ne’e liu-husi nia diskursu iha seremonia komferenisa nasionál partidu PLP, iha salaun Canosiana Has-Laran-Manleuna, Comoro, Dili, Domingu 27 Marsu 2022.
“Dezafiu ida ke obriga ita atu hatene loloos, sá janela, sá odamantan mak ita husik nakloke atu na’ok-ten sira tama hodi na’ok ita nia votus ida ne’e dezafiu ha’u deskobre ona. Dezafiu tuir fali mai halo nusa mak atu taka tiha kuak sira ne’e atu na’ok-ten sira ne’e labele tama. Ha’u hanoin bainhira plata forma de entendimentu la’o hamutuk kuak sira ne’e ita tenke taka hotu,” nia afirma.
Nia hatutan, nia hanoin aliansa entendimentu ida ne’e ba povu, organizasaun hotu-hotu nivel sosiadade na’ok-ten sira buka fatin la hetan, dalan atu ukun to’o 2023 sei nakloke nafatin.
“Bainhira ita manan segunda volta mós manan atu hatudu katak, sira mak manan ha’u fiar ita sei manan atu hatudu ba na’ok-ten sira katak tempu ba sira laiha ona”.
Sekretariu Jerál FRETILIN ne’e hatutan, nia halo sondajen ida, haruka ema kontaktu ba ema nain atus ba atus ba juventude sira 35 anos atu husu ba sira “imi vota ba sé? Sira hatan ami vota, maibé tenke buka hatene tanba saida ami vota ba Lú olo ne’e la sa’e”.
“Ha’u halo mós peskiza ida ba poling staf sira ida mak ita nia frakeza, ita nia problema mós ita nia ema kontrola ita nia fiskais sira para ita loke fila-fali ha’u dezafia loke fila-fali kaixa sira ne’e ita hare lei la husik maibé ha’u dezafia”.
“Lei dehan katak ba poling staff bainhira halo kontajén foti bulletin votu ne’e hateke ba sorin karuk no sorin loos hatudu ba ema sira hotu hotu depois mak dehan númeru 6, 14 no 8 maibé hatudu ba ema hotu-hotu poling staf balun hateten foti de’it númeru 14, númeru 14, númeru 14 to’o dala 10 ona mak númeru 6 ida no 8 ida,” Alkatiri prokupa.
Nia hatutan, ne’e mak halo sira nia votu ne’e sa’e, la konsege reklama tanba reklama sira ameasa tanba ne’e lalika tauk importante tenke organiza aan ba segunda ronde ne’e prontu.
Rezultadu eleisaun prezidensiál iha ronde dahuluk hatudu kandidatu Horta hetan votu validu hamutuk 303,477 (46.6%), no kandidatu Lú Olo hetan de’it 144,282 (22.1%).
KORESAUN:
Redasaun The Oe-Kusi Post (TOP) hakarak informa ba públiku katak iha alterasaun balun iha notisia nia titulu. Tuir loloos atu loke fali urna sira, la'os akta. Ba fallansu ne'e, redasaun hadia tiha ona no husu deskulpa ba públiku.
