Alkatiri dehan kandidatu Horta nia votu ne’e votu na’ok-ten nian

DILI (TOP) — Sekretariu Jeral Partidu FRETILIN Mari Bim Amude Alkatiri kontinua hatudu ninia frustasaun hodi lakohi simu rezultadu eleisaun prezidensial iha ronde dahuluk nian hodi konsidera total votu validu sira ne’ebé kandidatu Prezidente Repúblika José Manuel Ramos-Horta hetan ne’e mesak falsu no votu na’ok ten nian de’it.

“Kandidatu José Manuel Ramos Horta nia ba ho votu falsa,” Alkatiri hateten lia hirak ne’e bainhira hato’o nia diskursu iha seremonia konferenisa nasionál Partidu Libertasaun Popular (PLP) iha salaun Canosiana Has-Laran-Manleuna, Comoro, Dili, Domingu 27 Marsu 2022.

Sekretariu Jeral partidu FRETILIN Mari Bim Amude Alkatiri. Foto Julião Fernandes.

Alkatiri ne’ebé foin fila mai Timor-Leste hafoin hetan independensia gava Partidu Libersaun Popular (PLP) ne’ebé uluk nia rasik sarani ba “Partidu Lohi Povu” oras ne’e mai hamutuk ho nia ho votu verdadeiru, KHUNTO mós hanesan mai hamutuk ho FRETILIN ho nia votu verdadeiru rasik mós.

“Ha’u la hatene José Manuel Ramos Horta nian ka Xanana nian ne’e votu falsu, votu inventadu, votu na’ok-ten ninian. Bainhira ita evita na’ok-ten tama iha ita nia uma matan ne’e, ita tenke taka molok sira tama mak ita taka tiha odamanta ita la evita ona,” nia hateten.

“Horseik balun ema dehan mai ha’u, kandidatu José Manuel Ramos Horta la manan krize tama iha Timor Leste, ha’u dehan Lú Olo la manan krizi tama iha Timor-Leste toleransia hotu ona, vijilansia mós hotu ona”.

Kandidatu Prezidente Repúblika husi partidu CNRT José Manuel Ramos-Horta.

Alkatiri konsidera plata forma PLP, KHUNTO no FRETILIN ne’e solidu tebes no ema dehan atu hasai antes tinan 2023 ne’e mehi iha meudia boot.

Tanba Alkatiri sente la haksolok ho rezultadu eleisaun prezidensial iha ronde dahuluk ne’e mak nia hakarak loke fali urna sira.

Maske Alkatiri la kohi rekoñese povu maioria nia votu sira ba kandidatu Prezidente Horta, maibé STAE no CNE fó sai ona rezultadu provizoriu katak, rezultadu eleisaun prezidensial iha ronde dahuluk ne’e manan husi kandidatu Horta ho votu validu hamutuk 303,477 (46.6%), no kandidatu Lú Olo hetan de’it 144,282 (22.1%).

Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Jornalista