DILI (TOP) – Lideransa partidu politika sira iha leten buka malu, ka'er liman no hakuak malu hodi kontinua hametin liutan sira nia poder, maibé estrutura iha baze hamutuk ho nia militante sira ne'ebé durante ne'e la sente no la hetan benefisiu ruma husi ukun atual halai namkari hodi fó sira nia apoiu no votu ba kandidatu seluk.
Prezidente Partidu Libertasaun Popular (PLP) atual Primeiru-Ministru Taur Matan Ruak (TMR) ho Konseleiru Masimu Partidu KHUNTO José do Santos Bucar ka’er liman no hakuak malu hodi habit metin Sekretariu Jeral Partidu FRETILIN Mari Bim Amude Alkatiri atu apoiu kandidatu Prezidente Repúblika Francisco Guterres Lú Olo iha eleisaun ronde daruak nian, maibé iha parte seluk estrutura no militante sira husi partidu rua ne’e deklara sei apoiu fali kandidatu José Manuel Ramos-Horta.
Kandidatu Prezidente Repúblia, José Manuel Ramos-Horta agradese, tanba kontinua hetan apoiu husi juventude foin sa’e no koordenadór Partidu KHUNTO, PLP no Partidu Demokratiku (PD) husi nivel postu no munisipiu sira iha eleisaun ronde daruak nian.
Horta konsidera konfiansa husi KHUNTO, PLP no PD inklui membru no lider FRETILIN balun nu’udar forsa politika ida hodi fó vitória ba nia hamutuk ho povu Timor-Leste hadia hikas imajen Estadu Timor-Leste iha rai-laran, no liliu iha mundu internasional.
Premiado Nobel da Paz 1996 ne’e rasik hala’o ona enkontru ho Sekretáriu Jerál Partidu Demokratiku, Mariano Assanami Sabino hodi deskute pozisaun Partidu Demokratiku hodi deposita konfiansa votu ba Horta.
“Ha’u rasiki ko’alia ona ho ha’u nia alin Mariano Assanami Sabino, ba ha’u la’ós atu buka de’it PD nia votu, maibé dezde uluk PD forma iha tinan 20-liuba, ha’u sempre buka apoiu morál no materiál ba PD no ha’u mós enkontru ho Koordenadór sira hosi Partidu KHUNTO no PLP inklui elementu balun hosi FRETILIN hodi apoia ha’u nia kandidatura,” dehan Horta ba jornalista, hafoin enkontru ho koordenadór Juventude Partidu Demokratiku iha Palapasu, Dili, ohin.
Nia dehan, ho apoiu husi PD no partidu politikus sira seluk hodi reforsa liután votu ne’ebé nia hetan iha ronde dahuluk hamutuk 303.477 (46,6%) sei sa’e makas liután iha elisaun ronde daruak nian.
“Ho apoiu ida ne’e bele reforsa liután votu hamutuk 303.477 (46,6%) ha’u hetan ona, bele sa’e liután hodi hametin dame no hadia ita nia rain bainhira ha’u sai prezidente,” dehan Horta.
Horta dehan, maske iha palku politika, Konseleirru KHUNTO José do Santos Bucar bele hakuak malu ho Sekretáriu Jerál Partidu FRETILIN, Mari Bim Amude Alkatiri ho Preziente PLP, Taur Matan Ruak hodi deklara apoia Prezidente Partidu FRETILIN Fransisco Guterres Lú Olo nia kandidatura, maibé votu ne’e povu no militánte sira mak sei deside iha terenu.
“Naimori bele ko’alia oin-oin, maibé hakuak nia kamarada Mari Alkatiri, sira nian-rua bele buka kontra Maun Boot Xanana, maibé la’ós sira mak determina, tanba militante KHUNTO rihun ba rihun sei apoia ha’u nia kandidatura hodi vota iha loron 19 Abril agora,” dehan Horta.
Iha semana ida ne’e nia laran, Horta halo ona enkontru no simu kontaktu direita husi koordenadór partidu PLP, KHUNTU no FRETILIN balun ne’ebé nia labele temi sai sira nia naran, tanba ema hirak ne’e prontu ona atu vota ba nia.
Iha parte seluk, Koordenadór Partidu Demokratiku Munisipiu Dili, Agosto da Costa Soares dehan, sira sente orgullu no agradese tebes hodi hala’o enkontru ho Kandidatu Prezidente Dr. José Ramos Horta hodi deposita sira nia konfiansa no votu ba Ramos Horta.
“Ami mai hodi kumprimenta no hato’o parabéns ba Dr. José Ramos Horta, tanba Partidu Demokratiku mós iha ninia mekanismu rasik hodi fó apoiu,” nia hateten.
Entretantu, Premiadu Nobel da Paz, Ramos Horta apela nafatin ba povu no masa partidu politikus sira ne’ebé foin lalais apoiu nia iha eleisaun primeira ronda bele kontinua mantein pozisaun hodi apoia no vota nafatin iha segundu ronda.
PLP halo ona konferensia nasionál ida ne’ebé realiza iha salaun madre Canosiana iha Manleu-Dili iha loron Domingu 27 Marsu 2022.
Iha konferensia nasionál ne’e partisipa husi Sekretariu Jeral partidu FRETILIN Mari Bim Amude Alkatiri no Konseleiru masimu partidu KHUNTO José do Santos Bucar.
Durante diskursu, prezidente PLP Taur Matan Ruak katak, PLP desidi ona hodi la’o hamutuk ho Alkatiri to’o mate.
“Saida mak ita atu selu ba Maun Mari Alkatiri? Iha 2017 Maun Mari telefone ha’u atu fila ba Fretilin, ha’u hatan deskulpa maun ha’u la ba ona. Bou Naimori mos halai tiha. Kuandu CNRT so’e ami na’in rua nia mai fali. Loloos ne’e nia dehan hanesan ne’e; Matan Ruak, uluk ó halo ba ha’u, agora o simu o nian. Maibé nia la halo ida ne’e. Tanba ne’e saida maka ita halo? La’o ho nia to’o mate,” katak Matan Ruak.
Atual Primeiru-Ministru ne’e mós halo komparasaun ba personalidade Francisco Guterres Lú Olo nian ne’e hanesan Jesus Cristo.
“Ita ténke buka ema ida hanesan Jesus. Hatene terus para salva ema. Ema ida ne’ebé ema trata, nia nonok de’it, ema tolok nia nonok de’it, ema insulta nia nonok de’it, hanesan Jesus. Ema ne’e mak naran Lú Olo”.
