DILI (TOP) — Prezidente Partidu Demokrátiku Repúblika Timor (PDRT), Agustinho Gomes “Tinolina” hateten militante PDRT nain 30.000 resin garantia kandidatu Prezidente Repúblika José Manuel Ramos-Horta sei manan iha eleisaun prezidensiál iha ronde daruak.
“Ami garante katak kandidatu Prezidente Repúblika, José Manuel Ramos-Horta sei manan iha eleisaun segundu volta no persentajén boot liu-tan,” Agustinho Gomes hateten ba jornalista sira, hafoin hasoru malu ho kandidatu PR, José Manuel Ramos Horta, iha salaun Novel da Paz, Fárol, Dili, Tersa 29 Marsu 2022.
“Iha semana kotuk ne’e, ha’u hateten katak, ami nia militante hamutuk na’in 30 itál mill, 30 itál mill mai tiha hotu apoiu kandidatu Prezidente Repúblika, José Manuel Ramos Horta hotu ona. Ami husu tanba sá maka imi mai tiha kandidatu Dutor José Manuel Ramos Horta, sira dehan hanesan ne’e di’ak liu ami apoiu kandidatu PR, José Manuel Ramos Horta para depois bele hadia rai ida ne’e,” Tinolina afirma.
Nia hatutan, rajaun ida ne’e maka militante sira halai uluk mai tiha kandidatu Prezidente repúblika José Manuel Ramos Horta ne’e, nune’e estrutura partidu tuir tan de’it ba.
“Militante 30 itál mill ne’e, apoiu ona ami, ami fó tiha ona instrusaun para hotu-hotu hatene nia serbisu ona para dor too dor hodi lori votu sira hotu mai kandidatu Prezidente Repúblika, José Manuel Ramos Horta,” nia hateten.
Prezidente PDRT Agustinho Gomes “Tinolina” ne’e konta, reuniaun ohin halo oinsa kampaña ba oin hamutuk ho PDRT prefere la halo komísiu maibé PDRT halo door to door iha baze.
“Ami prefere door to door prontu, ha’u oferese ha’u nia aan no oferese ekipa ida atu servisu hamutuk ho kandidatu Prezidente Repúblika, José Manuel Ramos Horta para ami atu la’o hamutuk,” nia dehan.
Tinolino esplika, pratikamente dor too dor ne’e foin iha munsipiu hanesan Covalima, Ainaro, Bobonaro no Ermera dadauk ne’e ba Munisipiu Likisa no Dili. nia mensajen ba apoante sira iha baze hodi vota iha eleisaun prezidensial segundu volta ne’e.
“Ha’u fó mensajén kada loron ba munisipiu sira sempre fó telefone sira para bele habelar informasaun para bele lori tan ema balun mai hodi apoiu tan kandidatu Prezidente Repúblika, José Manuel Ramos Horta”.
“Ami mai para atu halo programa kampaña ne’e hodi halo sinkronizasaun atu apoiu kandidatu Prezidente Repúblika, José Manuel Ramos Horta no ami nian tanba ami atu fó apoiu ne’e ami tenke apoiu tuir programa sira nian,” nia hakotu.
