DILI (TOP) — Prezidente Partidu Sosiálista Timorense (PST) Avelino Coelho hateten, vota ba kandidatu Prezidente Republika José Manuel Ramos Horta ho númeru sorteiu 1 sei halakon krize konstitusionál iha Timor-Leste (TL).
Avelino Coelho esplika, tanba ema dezavia katak se vota ba kandidatu Prezidente Repúblika (PR), José Manuel Ramos Horta sei hamosu fali krize boot ida iha rai-laran, maibé ida ne’e laloos
“Vota ba maun José Manuel Ramos Horta sei halakon kriji konstituisionál, sei halakon kriji institusionáis, sei kria estabilidade sei kria paz, sei kria domin liu-husi dialogu hodi nune’e governu sé de’it mak ka’er governu bele konkretiza nia programa dezenvolvimentu,” Avelino Coelho hateten iha komísiu politika kandidatu Prezidente José Manuel Ramos Horta iha Tasi-tolu, Aldeia 12 de Outubru, Suku Komoro, Postu Administrativu Dom-Aleixo Munisipiu Dili, Tersa 12 Abril 2022.
Kampaña kandidatu José Ramos-Horta ba daruak iha Tasi-Tolu, Tersa 12 Abril 2022.
“Joven sira hotu hateten ba ita nia inan aman sira vota ba kandidatu Prezidente José Manuel Ramos Horta. Sei la hamosu kriji maibé rezolve kriji ne’ebé iha nanis tiha ona husi tinan 2017 mai to’o ohin loron,” nia hateten.
Nia esplika, iha tinan 2017 bainhira la fó pose ba governu minoritariu hamosu impase politika paraliza dezenvolvimentu Estadu lakon osan oi-oin más lakonsege halo dezemvolvimentu. Tanba konstituisaun da RDTL la fó dalan ba governu minoritáriu.
Iha tinan 2018 bainhira la fo pose ba membru governu ne’ebé mai husi partidu CNRT, koaligasaun hatudu dala ida tan katak viola normas konstitusionáis. Viola direitu politika do sidadaun maibé ohin mós rona ema hotu dehan katak sira mos defende estadu de direitu demokratiku.
“Ami mós defende estadu de direitu demokrátiku ami defende konstituisaun nusa maka ohin kampaña maka foin koalia, nusa iha tinan 2o2o. Bainhira movimentu siviku partidu sira koalia kona-ba estadu direitu demokratiku no koalia kona-ba konstituisaun nusa ita la halo debate kedas kona-ba postura sira ne’e,” nia esplika.
“Ohin maka foin dehan fali katak ita mos defende estadu direitu demokratiku ita defende konstituisaun problema maka ida ne’e baku fila meza foti meza hadau meza husi partidu CNRT partidu lejitimu partidu maioria parlamentár. Tanba ida ne’e inan aman sira no joven sira hotu iha timor laran tomak defeza estadu direitu demokrátiku defeza da konstituisaun maka dalan ida ne’e naksalak boot liu bainhira foti meja husi prezidente parlamentu nasionál ne’ebé partidu CNRT ne’ebé maioria maka kaer,” nia hateten.
Povu iha tinan 2018 vota ba Aliansa Maioria Parlamentu (AMP) ne’ebé partidu CNRT maka investe barak liu, partidu CNRT maka maioria asentu iha parlamentu nasionál bainhira la respeita ita viola koridor ba konstitusionáis.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
