DILI (TOP) — Korndenador Partidu Conselho Nasionál Reconstrução Timorense (CNRT), Munisipiu Dili, Luis Ximenes Caldeira hateten kandidatu José Manuel Ramos Horta sei manan ho votu ema nain rihun 120 iha munisipiu Dili.
“Iha Dili ita deklara tiha ona ita seidauk vota mós ita manan tiha ona, tanba ne’e tenke manan liu tan 100 mill. Ita sura ho kandidatu sira ne’ebé maka mai hamutuk ho ita sura hamutuk votus 120 mill,” Korndenador Partidu CNRT munisipiu Dili deklara iha komísiu politika kandidatu Prezidente José Manuel Ramos Horta iha Tasi-tolu, Aldeia 12 de Outubro, Suku Comoro, Postu Administrativu Dom-Aleixo Munisipiu Dili, Tersa 12 Abril 2022.
Korndenador Partidu CNRT munisipiu Dili ne’e, bolu kada reprezentante koordenador ida-idak husi postu administrativu sira iha munisipiu Dili. Partidu politika sira ne’ebé maka apoiu kandidatu José Manuel Ramos Horta. Tanba sira mak forsa politika iha munisipiu Dili.
“Ami nia servisu hamutuk liuhusi liña koordenasaun hodi mai hamutuk iha fatin ida ne’e tanba ita rona malu, ita fiar malu maka ohin loron ita moviliza ita nia ema sira mai halo kampaña,” nia apresia.
Nia hatutan, iha tempu kuarezma fuan tenke boot nafatin tanba vitoria iha kandidatu José Manue Ramos Horta nia liman. Ho nune’e iha munisipiu Dili iha ronde dahuluk ho votu rihun 81.
“Ita maka manan maioria iha Timor laran tomak ita taka fatin hotu-hotu, tanba ne’e atan husu nafatin ita boot sira nia konfiansa ita tenke metin liu tan, ita tenke forte liu tan ita tenke lori ema barak liu tan. Ita halo sentru votasaun sira iha Dili, votu ho dame no paz ba ita nia maun José Manuel Ramos Horta”.
Nia esplika, sura ema sira ne’ebé maka la vota iha primeira ronda no kandidatu sira seluk ne’ebé maka mai apoiu tan ho kandidatu José Manuel Ramos Horta sei to’o rihun 120.
