DILI (TOP) — Eis komendante das FALINTIL Rogerio Tiago Lobato hateten kandidatu Prezidente Repúblika Francisco Guterres Lú Olo viola estatutu Frente Revolusionáriu Timor Lorosa’e Independente (FRETILIN).
Eis komendante das FALINTIL ne’e hatutan, Prezidente Partidu FRETILIN no Sekretáriu Jerál durante tinan 20 kaer FRETILIN lakohi sai hakarak mate deit iha ne’ebá.
“FRETILIN tenke fó ba ema ne’ebé terus mate ba rai ida ne’e, lakon buat hotu ba rai ida ne’e. Sira la viola de’it konstituisaun Repúblika Demorátiku Timor Leste, sira viola estatutus FRETILIN nian,” Eis komendante das FALINTIL Rogerio Tiago Lobato hateten lia hirak ne’e iha komísiu politika kandidatu Prezidente José Manuel Ramos Horta iha Tasi-tolu, Aldeia 12 de Outubro, Suku Komoro, Postu Administrativu Dom-Aleixo Munisipiu Dili, Tersa 12 Abril 2022.
“Ha’u husu ba imi kamarada FRETILIN sira labele tuir ema hanesan bibi malae ne’e labele, FRETILIN la’os grupu ida nian maibé ema rihun ba rihun nian,” nia hateten.
Nia esplika, kandidatu Prezidente Repúblika José Manuel Ramos Horta nia fundador ASDT-FRETILIN komendante Kay Xanana Gusmão kontinuador obra Prezidente Nicolau Lobato nian.
Rogerio mós lamenta, durante tempu rezistensia ema sira husi Soibada, Salau no fatin seluk tan mak subar Lú Olo, maibé hafoin independensia to’o oras ne’e Rogerio dehan Lú Olo ‘nunka’ ba vizita ema sira ne’ebé subar no proteze nia durante iha tempu difisil nia laran.
Lú Olo desidi rekandidata aan ba Prezidente Repúblika ba periodu 2022 to’o 2027 ne’e hamosu kontroversiu iha CCF nia laran rasik, tanba ne’e mak mosu grupu FRETILIN balun nakfera hodi fó sira nia votu ba kandidatu jeneral reformadu Lere Anan Timur iha eleisaun prezidensial ronde dahuluk nian iha loron 19 Marsu 2022.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
