DILI (TOP) – Kandidatu Prezidente Repúblika José Manuel Ramos-Horta sente preokupa tebes ho movimentu ekipa susesu kandidatura Prezidente Repúblika husi partidu FRETILIN deskonfia uja osan hahu sosa votu ona iha rai-laran inklui iha munisipiu Ermera, maibé tantu husi Mari Bim Amude Alkatiri ho Lú Olo durante sira nia kampaña nasionál durante ne’e dun fali ekipa susesu kandidatu Horta nian mak uja osan sosa votu.
Tuir deklarasaun kandidatu Horta nian ne’ebé The Oe-Kusi Post (TOP) asesu iha pájina ofisial José Ramos-Horta nian katak, kuadru partidu FRETILIN ne’ebé foin eziste iha tinan 2000 alias F2000 inklui Ministru Estatal Miguel Carvalho deskonfia lansa politika fahe osan hodi sosa votu iha rai-laran liliu iha Ermera no Bobonaro, inklui mós halo ameasa ba lideransa lokal sira iha teritoriu nasional.
“Kuadru F2000 sira inklui Ministru ESTATAL Miguel Carvalho oras ne’e Konsentra iha Munisipiu Ermera hodi lansa politika Fahe Osan atu sosa votus. Kuadru F2000 sira nia estratejia maka tama sai suku hodi fahe osan no promete oho karau ba komunidade sira atu vota ba Lú Olo iha loron 19 Abril 2022,” deklara Horta.
Horta dehan, durante ne’e F2000 akuza katak ekipa husi José Ramos-Horta mak fahe osan ba povu, maibé realidade oras ne’e daudauk F2000 sira maka lansa hela politika anti demokrasia ida ne’e.
“La’os deit fahe osan, F2000 mós nia Redi Apoiu Fretilin (RAF) ne’ebé lansa propaganda fahe osan $200 kada tinan no $50 kada fulan ba militante F2000 sira,” Horta afirma.
Politika fahe osan ne’ebé F2000 lansa dadauk ne’e mak sei fó ameasa ba sustentabilidade fundu minarai nian.
Iha parte seluk, Vise Ministru Estatal Lino de Jesus Torrezão durante nia vizita ba iha Rejiaun Administrativu Espesial Oe-Kusi Ambeno (RAEOA) mós halo ameasaun ba lideransa komunitariu sira nain 18 iha Ambeno katak, bainhira la vota ba kandidatu Lú Olo, nia sei desidi hodi kansela xefe suku sira nia osan subsidiu mensal nian, maibé xefe suku sira ne’e nonok de’it.
Ministru Estatal husi partidu FRETILIN ne’e mós hasai ona despaisu ida hodi obriga funsionariu Ministériu Estatal tenke fila ba vota iha ida-idak nia munisipiu no obriga sira tenke hetan akta hafoin kontajen votu maske aktu ne’e viola momoos lei eleitoral, tanba lei eleitorál so permite de’it fiskais sira mak iha direitu atu hetan kopia akta, la’os funsionariu públiku sira.
Maske nune’e, vise Ministru Estatal Lino de Jesus Torrezão antes ne’e responde ona ba akuzasaun sira ne’e katak, ne’e laloos.
