DILI (TOP) – Estrutura nivel altu Partidu Libertasaun Popular (PLP) antes ne’e desidi ba nia militante no simpatizante sira iha teritoriu nasionál hodi vota ho konsiensia limitada, no oras ne’e husu tan ona hodi vota ba kandidatura Prezidente Repúblika, Francisco Guterres Lú Olo, maibé estrutura PLP iha baze monu namtati hanesan has tasak, basa maioria desidi la tuir orientasaun estrutura partidu nian.
Pozisaun estrutura nivel altu PLP nian desidi ona sei vota ba kandidatu PR Lú Olo, maibé estrutura PLP iha nivel munisipiu to’o nivel aldeia desidi ona hodi apoiu kandidatura PR José Ramos-Horta, no desidi mós atu vota ba partidu CNRT iha tinan 2023 hodi lori hikas Kay Rala Xanana Gusmão ba assume kargu Primeiru-Ministru atu bele halais liutan prosesu dezenvolvimentu iha rai-laran. Ho situasaun ne’e hatudu, PLP le’es-kelen fahe ba rua. Estrutura sira iha Metiaut ne’ebe desidi ba kandidatu seluk, no militante inklui estrutura sira iha rai-laran desidi halai ba kandidatura seluk.
"Ita PLP nia kultura katak ha nisin, sikat ruin, tenke vota Lú Olo,” II Vise-Prezidente PLP, Demetrio Amaral apela ba militante sira iha Aileu iha loron 08 Marsu 2022.
“Ha’u hakarak apela hanesan segundu vise-prezidente PLP ba Aileu oan sira no PLP iha munisípiu Aileu hateke Prezidente Lú Olo hanesan Prezidente ida ne’ebé pro-povu, tanba ida ne’e ba PLP oan sira keta haluha ita-nia kultura hatete, “han isin sikat ruin” tanba ida ne’e vota Lú Olo,” Demetrio Amaral apela.
Tanba ne’e nia iha obrigasaun morál hodi reafirma ba públiku katak tenke hatene no iha konsiensia kona-ba "Han isin sikat ruin".
“Ohin (8-marsu), ha’u hamrik iha fatin ida atu reafirma katak, Prezidente Lú Olo ne’ebé ukun tiha ona iha tinan lima, hatudu karater ida ne’ebé nuudar Prezidente ideal ba Timor-Leste ohin loron, tanba saida, Prezidente ida matenek maibé haraik-an, prezidente ida ne’ebé barani maibé prudente iha nia desizaun sira, Prezidente ida ne’ebé la halo desizaun arbiru, Prezidente ida ne’ebé la gasta tempu ba sira ne’ebé folin la’ek”.
Prezidente ida ne’ebé servisu ho nonok hodi hatudu rezultadu, Prezidente ida ne’ebé pro-povu. Ita boot sıra hatene iha tempu Prezidente Lú Ola ninian mak lei sira importante ba ita-nia rai, hetan promulgasaun hahú husi Lei Kontra Korupsaun, lei kona-ba seguransa sosiál promulga husi Prezidente Lú Olo, lei sira seluk ne’ebé ohin loron hatudu defeza ba povu Timor-Leste, hanesan” lei aumenta pensaun ba idozus sira, lei bolso da mãe, lei aumenta osan ba xefi suku no konsellu suku sira hotu, sira ne’e hotu tanba prezidente nia preferensia pro-povu,” Demetrio esplika.
Maske Deometrio husu no ezije militante sira tenke vota ba kandidatu Lú Olo, maibé Koordenador PLP munisipiu Baukau antes ne’e deklara ona hamutuk ho nia militante sira iha munisipiu Baukau sei fó sira nia votu ba kandidatu PR Horta iha eleisaun prezidensial ne’e.
Notisia relevante: Koordenador PLP Baukau desidi apoia Horta, la’os Isabel Ferreira
La’os akontese de’it iha Baukau, maibé deklarasaun hanesan ne’e mós akontese ba Koordenadór PLP, Atabae, Carlos Verificação katak hamutuk ho nia militante sira sei fó sira nia votu ba kandidatu PR Horta hodi hadia hikas imajen Estadu RDTL tantu iha rai-laran no iha komunidade internasional sira nia matan.
Notisia relevante: Lideransa partidu FRETILIN- PLP no PD deklara apoia Xanana Horta
“Ami tomak ohin deklara fila mai ho CNRT, no ami sei afirma ami nia pozisaun iha loron votasaun 19 de Marsu 2022 agora hodi vota iha maun boot José Ramos Horta no sei vota mós ba maun boot Xanana iha eleisaun parlamentar,” nia hatete.
