BEKORA (TOP) – Konstituisaun RDTL iha artigu 46 garante sidadaun hotu-hotu iha direitu atu halo no partisipa iha partidu polítiku sira. Tanba ne’e bainhira tama ona iha tempu politika sempre mosu afiliasaun militante sira husi partidu ida ba partidu seluk.
Prezidente partidu CNRT, Kay Rala Xanana Gusmão ho ninia kandidatu Prezidente Repúblika (PR) ba periodu 2022 to’o 2027 José Manuel Ramos-Horta durante ne’e uja violasaun konstituisaun nu’udar materia principal durante kampaña ba eleisaun prezidensial iha rai-laran, maibé materia ne’e la konsege konvense militante husi partidu CNRT hamutuk uma-kain 20 iha Bekora, Dili hodi halo ona afiliasaun ba partidu FRETILIN no kompromete sei fó sira nia votu ba kandidatu PR Francisco Guterres Lú Olo iha eleisaun prezidensial tinan ida ne’e.
Maibé, estrutura FRETILIN ho sira nia militante lubuk ida iha Oe-Kusi Ambeno no likisa mós desidi hodi halo afiliasaun ba partidu CNRT no promete sei fó sira nia votu ba kandidatu PR José Manuel Ramos-Horta iha eleisaun prezidensial iha loron Sábadu, 19 Marsu 2022.
Tuir informasaun ne’ebé The Oe-Kusi Post (TOP) asesu husi pájina ofisial Lú Olo Kandidatu Prezidente Repúblika 2022-2027 katak, afiliasaun ne’e maioria husi CNRT uma kain 20 resin hamutuk eleitor liu nain 130.
"Kandidatu Prezedenti husi povu ba povu tomak Francisco Guterres Lú Olo, ohin ita hotu mai iha ne’e para konfirma tan dala ida prosesu tomak atu halo aliansa ho povu komesa iha rezultadu, ha'u fó bem-vindo ba kamarada sira ne'ebé mak tama fali mai FRETILIN, ita mai atu konfirma kandidatu Prezedenti Repúblilka Lú Olo nia vitória, no ita prepara an ba eleisaun 19 marsu, ha'u hanesan Sekretáriu Jerál hamutuk ho aliadu (Os Verdes, PUDD, PLP no Kolimau 2000) sira konvida kamarada sira atu halo Tasi-Tolu Mean no Verdes." Sekretáriu Jerál FRETILIN Mari Alkatiri, hatete iha mini kampaña kanidatu PR Francisco Guterres Lú Olo iha Bekora, Dili, Segunda 14 Marsu 2022.
Alkatiri husu ba militante hotu atu lori tan ema ida ka rua ba vota ba númeru 6, kandidatu Prezedenti Repúblilka Francisco Guterres Lú Olo.
Iha biban nee, kandidatu Prezedenti Repúblilka Lú Olo, afirma katak prontu ona sai xefe estadu.
"Ha'u prontu ona mai hamrik ona jha imi nia oin, hodi sai kandidatu Prezidente Repúblika 2022 too 2027. Ha'u fó obrigado mós ba partidu FRETILIN, partido Os Verdes de Timor, Partido PUDD, PLP no Kolimau 2000 ne’ebé apoiu ha'u atu sai Prezidente Repúblika." Lú Olo, hatete.
Tanba ne'e atuál Prezidente Repúblika ne’e afirma, sei kontinua ho komprimisu katak sei kumpri de’it ba konstituisaun no knaar orgaun soberania sira hotu.
Kandidatu Prezedenti Repúblilka Lú Olo husu ba militantes no apointes sira atu labele fiar fali boatu sira husi parte sorin ne’ebé dehan Xefe Estadu viola konstituisaun. Maibé, Prezidente partidu CNRT, Kay Rala Xanana Gusmão no kandidatu PR José Manuel Ramos-Horta durante kampaña informa ba militante no simpatizante partidu CNRT nian iha teritoriu nasionál katak, durante tinan lima PR Lú Olo viola konstituisaun dala tolu kedas to’o da’et ba sobu rahun meja Parlamentu Nasionál.
