DILI: Premiadu Nobel da Paz, José Ramos Horta deklara bainhira eleitu sai prezidente republika periodu 2022-2027 nia parte parte komprometidu sei halo dialogu nasionál ho partidu politiku sira hodi hatuur fali orden konstitusional para bele hadia destinu no futuru povu no nasaun Timor-Leste.
Kandidatu Prezidente Repúblika ho númeru surteiu 14 Ramos Horta hato’o asuntu ne’e semináriu nasionál ho tema “Repõem Orden Costitucionais e Instituçoes Democráticas” ne’ebé organiza hosi Fakuldade Siensia Sosias, Deprtamentu Siensia Polisia Universidade Nasionál Timor Lorosa’e, (FSSDSP-UNTL), kuarta (23/02).
Horta dehan, nia parte akompaña situasaun politika ne’ebé akontese dadaun iha Timor-Leste tenki rezolve ho matenek no ulun malirin hodi labele mosu krize politika militár iha Timor-Leste. Tanba ne’e Horta komprometidu atu respeita no halo tuir de’it saida maka Konstituisaun RDTL haruka.
Knaar Prezidente tenki hatuur fali orden konstitusional ne’ebé politiku má-fé sira sobu no estraga tiha ona hodi hadia no hatur hikas lejitimidade no dignidade orgaun Parlamentu Nasional ne’ebé partidu ambisiozu sira halo liu hosi asaltu poder hodi sobu orgaun ida ne’e iha 19 Maiu 2020.
Horta hatutan, atu restaura fali lejitimidade no funsionamentu normal orgaun Governu ne’ebe dezde 2020 la-funsiona ho normal ne’ebe rezulta ekonomia rai laran hakdasak ba beibeik. Programa seluk tan maka sei halo reforma iha setor judisiariu nune’e bele garante no asegura aplikasaun Lei no Orden, liu-liu bele garante justisa tuir Konstituisaun no Lei sira haruka.
Nia hatutan, bainhira rezolve tiha problema hirak ne’e, Prezidente Republikas sei servisu makas ho governu bele atinje estadu tomak nia objetivu atu dada Kadoras Greater Sunrise mai Timor-Leste no luta hasoru kiak no mikit iha Timor-Leste.
Iha fatin hanesan, Dekanu Fakuldade Siensia Sosias UNTL, Camilio Ximenes de Almeida hato’o agradese ba tempu Laureadu Nobel da Paz, Ramos Horta hodi fó palestra ba estudante sira hodi kadi di’ak liután estudante universidade Siensia Sisias UNTL sira nia kapasidade hodi akompaña no hatene klean liután vizaun no misaun kandidatu Dr. Jose Ramos Horta bainhira sai prezidente repúblika periodu 2022-2027.
Tuir planu, FSS-UNTL sei hala’o mós semináriu hanesan hodi konvida kandidatu prezidente repunlika sira seluk hodi fahe sira nia esperensia ba estudante sira.
Semináriu nasionál ne’e partisipa direita hosi estudante FSS-UNTL kuaze 200 liu inklui dosente universidade sira.
Entretantu, iha parte seluk, Premiadu Nonel da Paz, Ramos Horta partisipa mós konfrensia nasionál, União dos Movimentos Democraticos e (UMDP) hodi hato’o palstre ba joven no intelektuál kuaze 300 liu ho tema “O Estadu do Direito Democratico As Eleiçoes Presidenciais e a Reposição da Ordem Cosntituciona Democratica” iha salaun enkontru Igreja Balide, Dili.
Iha palestra Horta hato’o liu servisu misaun diplomata nian ne’ebé nia parte halo hafoin Timor-Leste lakon funu iha tinan 1875 no nia parte ho lider Timoroan barak hala’o kontinua luta iha rai liur no kontaktu nafatin Komandante En-Xefe das FALINTIL, Kay Rala Xanana Gusmão no asuwain no juventude rezistensia sira hodi kontinua luta too Timor-Leste hetan vitória iha 1999.
