DILI (TOP) — Sekretariu Jeral Partidu Frente Revolusionáriu Timor-Lorosa’e Independente (FRETILIN) Mari Bin Amude Alkatiri so’e lia ba lider karizmatiku Kay Rala Xanana Gusmão sai fali Maromak iha eleisaun prezidensiál periode 2022-2027.
Alkatiri ne’ebé uja povu nia osan lubuk ida sosa kotu ona ro HAKSOLOK desde 2017, no to’o oras ne’e seidauk to’o mai Timor-Leste esplika ba juventude FRETILIN sira katak, antes ne’e iha ema hamutuk nain 17 mak hatama sira nia dokumentu ba Tribunal Supremu Justisa, no ikus mai iha nain 16 mak liu.
“Ita nia pozisaun másimu ba rai ida ne’e, balun sai fali Jesus ha’u mo’e ne’e, balun fali la’o mesak labele tau fali fotorgrafia Maromak iha kotuk a finál vota ba se ha’u la komprende,” Alkatiri hateten lia-hirak ne’e liu husi nia diskursu iha konferénsia nasionál dahuluk ba Juventude FRETILIN (JF) nian iha salaun Sentru Konvensaun Dili, Sesta 18 Fevereiru 2022.
Foto Julião Fernandes.
Konferénsia Nasionál dahuluk Juventude FRETILIN nian ne’e ho tema ‘’HAMETIN IDENTIDADE NO HABURAS KULTURA INSTITUSIONAL ATU HATUTAN MEHI FRETILIN NIAN’’, maibé diskursu Sekretariu Jeral partidu FRETILIN Mari Bim Amude Alkatiri nian la’os konsentra ba konferénsia ne’e, maibé fila ataka fali Kay Rala Xanana Gusmão ninia personalidade ligadu ba banner kandidatu PR José Ramos-Horta nian ne’ebé tau hamutuk ho imajen Kay Rala Xanana Gusmão nian.
Nia dehan, FRETILIN ukun la to’o rohan Mari maka sala, Xanana ukun la to’o rohan Mari maka sala, sala ne’e halo nusa loos.
“Tanba ne’e maka ha’u sala nain duni, ha’u simu sala hotu, maibé ha’u hakarak lori FRETILIN ba to’o vitoria. Ita tenke hatene loloos tinan lima ikus ne’e saida mak akontese iha ita nia rain. Ita labele haluhan buat ida, tinan lima ikus ne’e, prezidente ba povu ema husi FRETILIN lider FRETILIN Prezidente FRETILIN ita sente kedas katak tempu prezidente Lú Olo sai prezidente FRETILIN tempu ema hotu tenta atu sobu Estadu atake Prezidente Repúblika atake nia familia tomak lalika ko’alia atu atake ha’u ne’e normal,” nia dehan.
Nia konta, Prezidente Repúblika Franscisco Guterres Lú Olo kalma la hatan no halo nia servisu tuir dalan konstituisaun no halo nia serbisu atu evita prinsipiu konflitu.
Nia hatutan, uluk prezidente seluk iha tinan 2006 tama fali prezidente seluk tinan 2008 ema atu tuda mate nia, maka hare kedas governu dadauk simu hela krize provoka tiha krize depois maka rezolve sira ne’e la akontese tinan lima ikus ne’e.
“Agora atu sai xefe do estadu ninia diskursu ne’e kontra estadu ona, sai kandidatu ba prezidente repúblika atu hit mala deit ne’e laloos, balun tambor mamuk ne’e ha’u la ko’alia, balun fali derepente katak FRETILIN tenke muda hamutuk fali ho sira seluk kontra FRETILIN,” nia hateten.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
